پاۆلوداردا فاشيستەر باسىپ شىعارعان سوزدىك تابىلدى
الەكساندر ماگدەنكونىڭ ايتۋىنشا، ءتارجىما كىتاپشالارىن مايدانىنان ورالعان اكەسى الىپ كەلگەن ەكەن.
بۇگىنگە دەيىن سورەلەردە شاڭ باسىپ جاتقان ادەبيەتتىڭ قۇندىلىعىن ەندى تۇسىنگەن مايدانگەردىڭ ۇلى جادىگەرلەردى ءدۇيىم جۇرتقا كورسەتۋدى ۇيعاردى، دەپ حابارلايدى ك ت ك.
الەكساندر ماگدەنكو قولىنداعى ەكى كىتاپتى كۇيبەلەڭ تىرلىكپەن ءجۇرىپ، كوزگە ىلمەگەنىن ايتادى.
ەندى عانا بەتىن اشقان نەمىسشە- ورىسشا سوزدىكتەن جاعا ۇستاتار نەبىر تىركەستەردى تاۋىپتى. وندا فاشيستەر بودانىنا اينالدىراتىن باسقا ۇلتتاردىڭ ۆەرماحت اسكەرىنە قانداي قىزمەت كورسەتۋى كەرەك ەكەنى جازىلعان. ماسەلەن ارييلىك ءناسىل وكىلىنىڭ ەتىكتەرىن تازارتۋ، الدىلارىنا اس اكەلۋ مادەنيەتىن ۇيرەتەتىن جولداردى دا تابۋعا بولادى.
«بۇنى وقىعاندا قاتتى اشۋلاندىم. ولار جەڭىسكە جەتەتىنە سەنىمدى بولعاندارى سونشا، قۇلدارىنا بەرەتىن بۇيرىقتاردى الدىنا الا جازىپ، ورىس تىلىنە اۋدارىپ قويعان»، - دەيدى زەينەتكەر الەكساندر ماگدەنكو.
سوعىستا قولدانىلاتىن «قارۋدى تاستا»، «مينا قويىلعان جەردى كورسەت» دەگەن تىركەستەردەن بولەك، «قايسىسىڭ ەۆرەي؟ قايسىسىڭ ۋكراينسىڭ؟» دەگەن سۇراقتار دا اۋدارىلىپتى. ال مۇنىڭ قاسىندا ءدال سول كەزەڭدە كەڭەس وداعىندا شىعارىلعان اسكەري سوزدىكتەردىڭ مازمۇنى تىم قاراپايىم. وندا نەمىسشە «اۋىز سۋ بار ما؟» جانە «بەرلينگە قاراي جولدى كورسەتەسىز بە؟» دەگەن ساۋالدار عانا بار.
1944 - جىلى فاشيستتىك گەرمانيادا باسىلعان بۇل شاعىن سوزدىكتەردى بەرليندى الۋعا قاتىسقان اكەسى الىپ كەلىپتى. كەۋدەسى وردەنگە تولىپ ورالعان مايدانگەر 80 نەن اسقان شاعىندا قايتىس بولعان. ال ارداگەردىڭ بالاسى سوزدىكتەردى مۇراجايعا تاپسىرۋدى جوسپارلاپ وتىر.
ويتكەنى تاريحى قۇندىلىعى بار كىتاپتاردىڭ وسكەلەڭ ۇرپاققا بەرەرى مول دەيدى ول.
BNews.kz