كورشىدەن قاشانعى ءسۇت سۇرايمىز - باسپا سوزگە شولۋ
«ەگەمەن قازاقستان» گازەتىندە «الەۋمەتتىك زەرتتەۋ جۇرگىزىلەدى» دەگەن ماقالا كوپشىلىك نازارىنا ۇسىنىلىپ وتىر.
كەشە قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىندە «قازاقستان ازاماتتىق اليانسى» زاڭدى تۇلعالار بىرلەستىگىنىڭ اتقارۋشى ديرەكتورى يلدار كاتەنوۆتىڭ جانە «دەموكراتيا ينستيتۋتى» عىلىمي- زەرتتەۋ قاۋىمداستىعى» قوعامدىق بىرلەستىگىنىڭ ديرەكتورى يۋليا كۋچينسكايانىڭ قاتىسۋىمەن بريفينگ ءوتتى.
ي. كاتەنوۆ ءوز سوزىندە 26 - ساۋىردە قازاقستان ومىرىندە ايرىقشا وقيعا وتەتىنىن تىلگە تيەك ەتە كەلە، تاۋەلسىزدىك العان جىلداردان بەرى ەلىمىزدە بىرنەشە مارتە سايلاۋ ناۋقانى بولعانىن جەتكىزدى.
«تاۋەلسىزدىك العان جىلداردان بەرى قازاقستاندا بىرنەشە مارتە سايلاۋ وتكىزىلدى. ءار سايلاۋ سايىن وسى ۇدەرىسكە قاتىسۋشىلاردىڭ ساياسي مادەنيەتىنىڭ ارتقانى اڭعارىلادى. ەركىن جانە اشىق سايلاۋ - قوعامدا دەموكراتيانى نىعايتۋدىڭ كەپىلى. سايلاۋ - ءار ازاماتتىڭ نەگىزگى قۇقىعى، ونى پايدالانۋ ارقىلى مەملەكەتتىڭ بۇدان ارعى دامۋ باعىتىن ايقىنداۋعا بولادى.
بۇل جاعدايدا، ءار ازامات سايلاۋ ناۋقانىنان تىس قالماۋى ءتيىس»، دەدى ي. كاتەنوۆ. بۇگىندە 500 دەن استام ۇكىمەتتىك ەمەس ۇيىمنىڭ باسىن بىرىكتىرەتىن «قازاقستان ازاماتتىق اليانسى» مەملەكەت قىزمەتىنە باعا بەرىپ، ءتۇرلى الەۋمەتتىك زەرتتەۋ جۇمىستارىن جۇرگىزەدى.
«ءبىز ءۇشىن الداعى ەل پرەزيدەنتىنىڭ سايلاۋىن باعالاۋ ماڭىزدى. قازاقستاننىڭ ازاماتتىق اليانسىنىڭ 2012 - جىلى پارلامەنتتىڭ ءماجىلىسى مەن ءماسليحات دەپۋتاتتارى سايلاۋىندا سايلاۋالدى ەلەكتورالدى ناۋقانىن باقىلاۋدا تاجىريبەسى بار. بيىل دا وتكەن سايلاۋداعىداي سول كۇنى سايلاۋشىلار سايلاۋ ۋچاسكەلەرىنەن شىققاننان كەيىن ساۋالداما جۇرگىزىپ، الەۋمەتتىك زەرتتەۋلەر وتكىزۋدى كوزدەپ وتىر»، - دەدى ءوز سوزىندە اتقارۋشى ديرەكتور.
باس باسىلىمدا «وتكەنگە تاعزىم - بولاشاققا تاعىلىم» اتتى تاقىرىپپەن پارلامەنت ءماجىلىسىنىڭ دەپۋتاتى ورازكۇل اسانعازىنىڭ كولەمدى ماقالاسى بەرىلگەن. «ياعني، ءبىز ەندىگى جەردە ەكونوميكامىزدى نىعايتا وتىرىپ، رۋحاني تۇرعىدان ءوزىمىزدى ءوزىمىز تانۋدى ماقسات ەتەمىز، سول ارقىلى سىرتقى سۇراقتارعا دا جاۋاپ بەرەمىز. ولاي بولسا، قازاق حاندىعىنىڭ 550 جىلدىعىن اتاپ ءوتۋ - وسىنداي ءبىرقاتار ماسەلەلەردىڭ ءتۇيىنىن شەشەتىن، ءتول تاريحىمىزدى كەزەڭ- كەزەڭمەن تەزدەن وتكىزەتىن ءدۇبىرلى توي دەپ ەسەپتەيمىن. سوندىقتان مەملەكەتتىك دەڭگەيدە باقىلاۋعا الىپ، ءبىرقاتار ماقساتتارعا قول جەتكىزۋ ءۇشىن ءىس- شارانىڭ ماڭىزى مەن ناتيجەسىن بەلگىلى دەڭگەيدە انىقتايتىن العىشارتتاردى ىرىكتەپ العانىمىز دۇرىس»، - دەيدى دەپۋتات.
***
استانادا وتكەن ازىق- تۇلىك قاۋىپسىزدىگىنە ارنالعان كونفەرەنتسيادا اۋىل شارۋاشىلىعى ءمينيسترى اسىلجان مامىتبەكوۆ كەپتىرىلگەن ءسۇت ۇنتاقتارىن «تابيعي ءسۇت» رەتىندە ساتاتىنداردى سىنعا الىپ، دۇكەندەردەگى سۇتتەردىڭ تەڭ جارتىسى رەسەيدەن اكەلىنەتىن ارزان ۇنتاقتاردان جاسالاتىنىن، ونى وندىرۋشىلەر ءسۇت قورابىنىڭ سىرتىنا «تابيعي ءسۇت» دەپ جازىپ، تۇتىنۋشىلاردى الداپ كەلگەنىن ايتتى.
«جاقىندا عانا قوستانايداعى ءسۇت فەرماسى ءسۇت زاۋىتتارى ءونىمىن الۋدان باس تارتقاندىقتان، 30 تونناعا جۋىق تابيعي ءسۇتتى توگۋگە ءماجبۇر بولعان. ويتكەنى زاۋىتتارعا تابيعي ءسۇتتى ساتىپ العاننان گورى، رەسەيدەن اكەلىنەتىن ارزان ۇنتاقتى پايدالانىپ، سونى تابيعي ءسۇت رەتىندە ساۋداعا شىعارۋ ءتيىمدى بولىپ وتىر»، - دەپ جازادى «ايقىن» گازەتى بۇگىنگى سانىندا جارىق كورگەن «كورشىدەن قاشانعى ءسۇت سۇرايمىز» اتتى ماقالاسىندا.
وسى گازەتتە «مۇستافا سالعان سارا جول» اتتى ماقالا بەرىلگەن. ۇستىمىزدەگى جىلدىڭ 12-18 - مامىر ارالىعىندا تاەكۆوندودان الەم چەمپيوناتىنىڭ جالاۋى جەلبىرەيدى. بۇل جارىسقا الەمنىڭ 130 مەملەكەتىنەن كەلگەن 800 دەن اسا سپورتشى قاتىسادى دەپ كۇتىلۋدە.
ەرلەر مەن ايەلدەر اراسىنداعى باسەكەدە 16 مەدالدار جيىنتىعى ساراپقا سالىنادى. باق سىناۋشىلار قاتارىندا قازاقستاننىڭ ۇلتتىق قۇراما كومانداسى دا بار.
«سوڭعى ەكى الەم چەمپيوناتى 2011 -جىلى وڭتۇستىك كورەيانىڭ كەندجۋ جانە 2013 -جىلى مەكسيكانىڭ پۋەبلا- دە- ساراگوسا قالالارىندا ءوتتى. وكىنىشكە قاراي، بۇل جارىستاردا جەرلەستەرىمىز جەڭىس تۇعىرىنا كوتەرىلە المادى. ەندى رەسەيدەگى باسەكەدە سول ولقىلىقتىڭ ورنى تولادى دەپ ۇمىتتەنەمىز. سەبەبى، التى قىردىڭ استىندا ريو- دە- جانەيرو وليمپياداسى مەنمۇندالاپ تۇر. عالامدىق دودادا وتانداستارىمىزعا ازىرگە ءبىر عانا جۇلدە بۇيىردى. 2008 -جىلى بەيجىڭدەگى باسەكەدە ارمان شىلمانوۆ قولا مەدالدى كەۋدەسىندە جارقىراتتى. ەندى الەم چەمپيوناتى مەن وليمپيادا ويىندارىندا قايتا اتوي سالاتىن كەز كەلدى. سول جەڭىستى جول چەليابىدەن باستاۋ السا، تىپتەن كەرەمەت بولار ەدى...»، - دەپ جازادى ماقالا اۆتورى.
***
«ەكسپرەسس ك» گازەتىنىڭ بۇگىنگى سانىندا «ۋروكي ۆ كايف» دەگەن ماتەريال باسىلدى. وسكەمەندە 16 جاستاعى كوللەدج ستۋدەنتى پارتادا وتىرىپ، ەسىرتكى ساۋدالاعانى ءۇشىن ۇستالعان بولاتىن. اتاپ ايتقاندا وپەراتسيا بارىسىندا كۇدىكتى ساباق ۇستىندە اۋديتوريادا تۇتقىندالدى. ونىڭ ءۇيىن ءتىنتۋ كەزىندە دە ەسىرتكى مەن گەروين ولشەگەن ەلەكتروندى تارازى تابىلدى. سوت ەسىرتكى ساۋدالاعان ستۋدەنتتى ەرەكشە تارتىپتەگى تاربيەلەۋ كولونياسىندا ون جىلعا باس بوستاندىعىنان ايىرۋ ۇكىمىن شىعاردى.
اۆتور: رۋسلان عابباسوۆ