الماتىدا كورنەكتى جازۋشى گەرولد بەلگەردى ەسكە الۋ كەشى ءوتتى

الماتى. قازاقپارات - بۇگىن الماتىدا ۇلتتىق كىتاپحانادا قازاقستانعا بەلگىلى جازۋشى- اۋدارماشى گەرولد بەلگەردى ەسكە الۋ كەشى ءوتتى. وعان جازۋشىنىڭ كوزىن كورگەن ۇزەڭگىلەس دوستارى جانە باسقا دا بەلگىلى اقىن-جازۋشىلار قاتىستى.

«بۇگىن ءبىز ەلىمىزگە بەلگىلى قوعام قايراتكەرى، قازاق، ورىس جانە نەمىس تىلدەرىندە قاتار قالام تەربەگەن كورنەكتى جازۋشى، دارىندى اۋدارماشى، تاماشا پۋبليتسيست گەرولد بەلگەردى ەسكە الۋ ءۇشىن جينالىپ وتىرمىز. ول بيىل 7- اقپان كۇنى 81 جاسىنا قاراعان شاعىندا دۇنيەدەن وزعان ەدى. ءبىراق، ونىڭ پاتريوتتىق رۋحقا تولى شىعارمالارى مادەنيەتىمىزدىڭ اسىل قازىنالارى بولىپ قالا بەرمەك»، - دەدى وسى كەشتى اشىپ جاتىپ بەلگىلى قوعام قايراتكەرى، مادەنيەتتانۋشى مۇرات اۋەزوۆ.

ول سونىمەن قاتار، الماتىدا ءبىر كوشەگە گەرولد بەلگەردىڭ ەسىمىن بەرۋ كەرەكتىگىن العا تارتتى. گەر اعا سوڭعى 41 جىل ءومىرىن وسى الماتى قالاسىندا وتكىزگەن ەكەن.

جيىن بارىسىندا گەرولد بەلگەردىڭ ءومىرى مەن شىعارماشىلىعىنا ارنالعان 20 مينۋتتىق فيلم كورسەتىلدى. وندا جازۋشىنىڭ قازاقستاندى ءوزىنىڭ شىن وتانى سانايتىندىعى، الماتىنى قاتتى ۇناتاتىندىعى تۋرالى ايتقان جان تەبىرەنتەرلىك اڭگىمەلەرى كورەرمەندەردى قاتتى تولقىتتى.

اۆتور: جاپپاربەرگەن ايبوتا