پرەزيدەنتتىككە نيەت بىلدىرۋشىلەر پسيحيكالىق دەنساۋلىعىن تەكسەرتۋگە مىندەتتەلۋى مۇمكىن
ق ر ورتالىق سايلاۋ كوميسسياسىنىڭ وكىلدەرى وسىنداي پىكىر ءبىلدىردى، - دەپ حابارلايدى Tengrinews.kz ءتىلشىسى.
ورتالىق سايلاۋ كوميسسياسىنىڭ كەزەكتى وتىرىسىندا پرەزيدەنتتىككە ءوزىن- ءوزى ۇسىنعان ەكى ادامدى - سەرىك مۇقاش پەن مۇرات تەلىبەكوۆتى تىركەۋگە الۋدان باس تارتۋ تۋرالى شەشىم قابىلداندى.
و س ك مۇشەسى ءلاززات سۇلەيمەننىڭ ايتۋىنشا، تەلىبەكوۆ قازاق ءتىلى ەمتيحانى راسىمدەرىنەن باس تارتتى.
«مەن، و س ك وكىلى، سەبەبىن تۇسىندىرگىم كەلەدى: وعان الدىن الا ۋاقىت بەلگىلەندى، ول ەمتيحاندى بەلگىلەنگەن ەرەجە بويىنشا تاپسىرۋدان باس تارتىپ، ءوز تالاپتارىن ۇسىندى. كوميسسيا حاتشىسى بيلەتتەردى ەكى رەت ۇسىندى، ول ادەيى باس تارتتى. ول ءوزىن ەرسى ۇستادى، داۋىس كوتەردى. نيەت ءبىلدىرۋشى جازبا جۇمىسىن ورىنداۋعا كىرىسۋدەن باس تارتتى، سوندىقتان ءراسىمدى جالعاستىرۋ مۇمكىن بولمادى»، - دەدى سۇلەيمەن.
بۇدان كەيىن و س ك ءتوراعاسىنىڭ ورىنباسارى ۆلاديمير فووس لينگۆيستيكا كوميسسياسى مۇشەلەرى كانديداتتاردىڭ پسيحيكالىق دەنساۋلىعىن تەكسەرۋ ءراسىمىن قايتا ەنگىزۋ تۋرالى ۇسىنىس ايتقانىن حابارلادى.
«لينگۆيستيكا كوميسسياسى مۇشەلەرى پىكىر الماستى، ولار ورتالىق سايلاۋ كوميسسياسىنا سايلاۋ تۋرالى زاڭعا پسيحيكالىق دەنساۋلىق تۋرالى انىقتامانى مىندەتتى تۇردە تالاپ ەتۋ تۋرالى وزگەرىس ەنگىزۋدى ۇسىندى»، - دەپ قوستادى ونى سۇلەيمەن.
بۇرىن مۇنداي ۇسىنىستى لينگۆيستيكا كوميسسياسىنىڭ باسشىسى مىرزاتاي جولداسبەكوۆ تە ايتقان ەدى. «بۇرىن پرەزيدەنتتىككە كانديدات ءوزىنىڭ دەنساۋلىعى تۋرالى مەديتسينالىق انىقتاما تاپسىراتىن. وتكەن سايلاۋلاردىڭ بىرىندە ە ق ى ۇ باقىلاۋشىلارى بۇل ادام قۇقىعىن بۇزۋ دەگەن ەسكەرتۋ جاساپ، ول ەرەجە الىپ تاستالدى. كىم ءۇشىن دە جۇمىسقا ورنالاساردا مىندەتتى شارت رەتىندە مەديتسينالىق انىقتاما تالاپ ەتىلەدى. ال پرەزيدەنتتىككە كانديدات مەديتسينالىق انىقتاما تاپسىرمايدى. مۇمكىن، ونىڭ دەنى ساۋ ەمەس شىعار؟! بۇل وتە قاۋىپتى دەپ ويلايمىن»، - دەدى ول.
ايتا كەتەيىك، 15 - ناۋرىزدا قازاقستان پرەزيدەنتتىگىنە ۇمىتكەرلەردى ۇسىنۋ اياقتالدى. بۇل مەرزىمدە ورتالىق سايلاۋ كوميسسياسىنا 27 ادام ءوتىنىش بەردى. سايلاۋ 2015 - جىلدىڭ 26 - ساۋىرىندە وتەدى.