س. مۇقاشيەۆ مەملەكەتتىك ءتىلدى ەركىن مەڭگەرمەگەن - لينگۆيستيكالىق كوميسسيا

استانا. قازاقپارات - ق ر پرەزيدەنتتىگىنە ءوزىن- ءوزى ۇسىنعان سەرىك مۇقاشيەۆ مەملەكەتتىك ءتىلدى ەركىن مەڭگەرمەگەن.

«سىزگە جازبا جۇمىسىنا «قازاقستان اسسامبلەياسى - قازاقستان تابىسى» دەگەن تاقىرىپ كەلدى. تاقىرىپتى اشا المادىڭىز. شىنىندا بۇل اسسامبلەيانىڭ تابىستىلىعى وزگە مەملەكەتتە جوق. اشۋ كەرەك ەدى، شىنىندا دا تاقىرىپتى اشا المادىڭىز. جۇمىس ساۋاتسىز جازىلعان. 35 قاتە كەتىپتى ەكى بەتتىك جۇمىستان. ونىڭ ىشىندە ەملە قاتەسى- 11، تىنىس بەلگىسى- 15، ءستيلى - 9»، - دەدى كانديداتتىڭ سىناق ناتيجەسىن جاريا ەتكەن ق ر پرەزيدەنتتىگىنە كانديداتتاردىڭ مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكالىق كوميسسيا ءتوراعاسى مىرزاتاي جولداسبەكوۆ.

ۇمىتكەرگە ەكىنشى كەزەڭدە ابايدىڭ قارا سوزدەرى، ناقتى ايتقاندا 43- قارا ءسوزى تۇسكەن. «ەجىكتەپ وقىدى، ءبىرىنشى سىنىپ بالاسى سياقتى كەيبىر سوزدەردى قايتالاۋمەن بولدى. ۇنامسىز دەگەن ءسوزدى 7 رەت وقىدى، باستىق دەگەن ءسوزدى وقي المادى. اۋىزەكى سويلەي العانىمەن، ۇمىتكەر وقي المايدى دەپ ەسەپتەيدى كوميسسيا»، - دەدى ول.

«كوزىلدىرىك دۇرىس بولمادى سوسىن وقي المادىم. ول قاتە پىكىر. سونى ەسكەرىڭىز»، - دەدى كوميسسيا مۇشەلەرىنە س. مۇقاش.

ءۇشىنشى تاپسىرما رەتىندە «حالىق تاريحي جانە رۋحاني جادىگەرلەر» تاقىرىبى تۇسكەن.

«رۋحاني جادىگەرگە نە جاتاتىنىن ءسىز تۇسىنبەيسىز. ىدىس- اياق، قامشى، كيىم- كەشەك، ساندىق، وسىلاردىڭ بارلىعىن ءسىز بىزگە ءتىزىپ بەردىڭىز. لينگۆيستيكالىق كوميسسيانىڭ قورىتىندىسى: سەرىك تاسقارا ۇلى مۇقاش قازاق ءتىلىن مەڭگەرمەگەن. سىزگە دايىندالۋ كەرەك»، - دەدى م. جولداسبەكوۆ.

اۆتور: مارلان جيەمباي