ەكس-مينيستر نازاربايەۆتان كەيىنگى كوڭىلدەن شىققان ۇمىتكەر بولدى

استانا. قازاقپارات - بۇگىن قازاقستان پرەزيدەنتتىگىنە ۇمىتكەر رەتىندە ءوتىنىش بەرگەن ءابىلعازى قۇسايىنوۆ مەملەكەتتىك تىلدەن ەمتيحان تاپسىرىپ، سىننان سۇرىنبەي ءوتتى.

ەكس-مينيستر نازاربايەۆتان كەيىنگى كوڭىلدەن شىققان ۇمىتكەر بولدى

«ءبىرىنشى سۇراعىنا «ەل مەن جەر تاعدىرى» دەگەن تاقىرىپ كەلدى. تاقىرىپتى اشقان، 6 قاتە جىبەرگەن. 1 ەۋى ەملە، 3 ەۋى تىنىس بەلگىسى، ستيلدىك قاتەسى 2 ەۋ.

جالپى، وسى كۇنگە دەيىن لينگۆيستيكالىق كوميسسيا 8 دەن جوعارى قاتە جىبەرسە جانە جاۋابى ناشار بولسا، وندا ول كانديدات مەملەكەتتىك ءتىلدى ەركىن مەڭگەرمەگەن دەگەن قورىتىندى شىعارىپ ءجۇر. ال بۇل كىسىنىڭ جاۋابى جاقسى»، - دەدى قۇسايىنوۆتىڭ سىناق ناتيجەسىن جاريا ەتكەن ۇمىتكەرلەردىڭ مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكالىق كوميسسيانىڭ ءتوراعاسى مىرزاتاي جولداسبەكوۆ.

ونىڭ اتاپ وتۋىنشە، ەكىنشى تاقىرىپتا قۇسايىنوۆ اۋەزوۆتىڭ پروزاسىنان ءۇزىندىنى مانەرلەپ، جاقسى وقىعان.

«ءۇشىنشى تاقىرىپ - «ىرىس الدى - ىنتىماق». وتە ادەمى اڭگىمە بولدى. كوميسسيا مۇشەلەرى ريزاشىلىق تانىتتى. شىنىن ايتۋىمىز كەرەك، قازىرگى پرەزيدەنتىمىز نۇرسۇلتان ءابىش ۇلى نازاربايەۆتان كەيىنگى كوڭىلىمىزدەن شىققان جاقسى جاۋاپ بولدى. سايلاۋعا وسىنداي قايراتكەرلەر ءتۇسۋى كەرەك. كەشە مينيستر بولعان، ەلىمىزدە ۇلكەن وبلىستى باسقارعان ازامات، قازىر قازاقستاننىڭ كاسىپوداقتار فەدەراتسياسىن باسقارادى. ءبىزدىڭ لينگۆيستيكالىق كوميسسياسىنىڭ شەشىمى - ءابىلعازى قالياقپار ۇلى قۇسايىنوۆ قازاق ءتىلىن ەركىن مەڭگەرگەن. ءبىز سىزگە تابىس تىلەيمىز. قازاقستانعا وسىنشا جاقسىلىق جاساپ، مەملەكەت قۇرعان نۇرسۇلتان نازاربايەۆپەن تالاسۋ وڭاي ەمەس، تىرىسىپ باعۋ كەرەك»، - دەگەن جولداسبەكوۆ ۇمىتكەرگە ساتتىلىك تىلەدى.

ءابىلعازى قۇسايىنوۆ لينگۆيستيكالىق كوميسسيا سىنىنان وتكەننەن كەيىن سايلاۋالدى باعدارلاماسىن كانديدات رەتىندە تىركەلگەننەن كەيىن جاريالايتىنىن مالىمدەدى.

«ءۇش كەزەڭنەن تۇراتىن مەملەكەتتىك ءتىلدى ەركىن مەڭگەرگەندىكتى انىقتاۋ سىناعىنان ءوتتىم. ءبىرىنشى كەزەڭدە جازبا جۇمىسىن جازىپ، ەكىنشىسىندە ءماتىن وقىدىم. ءۇشىنشى كەزەڭدە بەلگىلەنگەن تاقىرىپ بويىنشا ەركىن اڭگىمە بولدى. مەنىڭشە سىناقتىڭ ءۇش كەزەڭىن دە جاقسى تاپسىردىم. ونى كوميسسيا ءتوراعاسىنان وزدەرىڭىز دە ەستىدىڭىزدەر»، - دەدى قۇسايىنوۆ سىناقتان كەيىن.

سونىمەن قاتار ول لينگۆيستيكالىق كوميسسيا ءاربىر كانديداتقا ءادىل بولعانىن باسا ايتتى.

«سايلاۋالدى باعدارلامامدى جاريالاۋعا ءالى ەرتە. بۇگىنگى كۇنگى باستى ماسەلە تىركەۋدەن ءوتىپ، 93 مىڭ قولداۋ قولىن جيناۋ كەرەك. سودان كەيىن مەن ءوزىمنىڭ سايلاۋالدى باعدارلامامدى جاريا ەتەتىن بولامىن»، - دەدى ول باق وكىلدەرىنىڭ ساۋالىنا وراي.