ناعاشىباي مۇقاتوۆ - ليريك اقىن

استانا. قازاقپارات - بۇگىن - بەلگىلى اقىن، قازاقستان جازۋشىلار وداعىنىڭ مۇشەسى، فيلولوگيا عىلىمدارىنىڭ كانديداتى ناعاشىباي مۇقاتوۆتىڭ تۋعان كۇنى.

ن. مۇقاتوۆ قوستاناي وبلىسى، جانگەلدين اۋدانىنا قاراستى، تورعاي سەلوسىندا 1949-جىلى 14- ناۋرىز كۇنى دۇنيەگە كەلگەن.

ول ەڭبەك جولىن جانگەلدين اۋداندىق «جاڭا ءومىر» گازەتىنەن باستاعان. سول كەزدەرى اۋداندىق، وبلىستىق اقىندار ايتىسىنا بىرنەشە مارتە قاتىسىپ، جەڭىمپاز اتانعان.

ناعاشىباي مۇقاتوۆ - الماتى قالاسىنداعى ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىنىڭ تۇلەگى. ول قازاقستان راديوسى جانە تەلەديدارى سالاسىندا 40 جىلعا جۋىق قىزمەت جاسادى. بايىرعى تورعاي، قوستاناي وبلىستىق راديولارى رەداكسياسىندا جۋرناليستىك قىزمەت اتقارعان. قوستاناي وبلىستىق تەلەراديو كومپانياسىندا قازاق رەداكسياسىن، «شاڭىراق» شىعارماشىلىق بىرلەستىگىن باسقارعان. رەسپۋبليكالىق تەلەديدار حابارلارى فەستيۆالىندە ءۇش مارتە جۇلدەگەر اتاندى.

اقىن بۇگىنگى تاڭدا قوستاناي قالاسىندا تۇرادى. وبلىس ورتالىعىنداعى بۇقارالىق سيپاتتاعى مادەني شارالارعا بەلسەندى تۇردە ارالاسادى. ول جىلدا وتەتىن وقۋشىلاردىڭ وبلىستىق «جاس تۇلپار» ايتىسىنىڭ، مۇقاعالي ماقاتايەۆ اتىنداعى بايقاۋدىڭ تۇراقتى ءادىلقازىلار القاسىنىڭ مۇشەسى. قوستانايداعى ايماقتىق ايتىستى جۇرگىزۋشى رەتىندە دە تانىمال. مارتەبەگە يە قازاق ءتىلىنىڭ تاعدىرى جايلى راديو، تەلەديداردان ءجيى سويلەيدى، باسپا سوزگە ۇنەمى ماتەريالدار جازىپ تۇرادى. وبلىستىق ءتىل وقىتۋ ورتالىعى تىڭداۋشىلارىنا ءدارىس بەرەدى.

قوستاناي وبلىستىق ى. التىنسارين مەموريالدىق مۇراجايىنىڭ ديرەكتورى بولىپ 7 جىل قىزمەت ىستەدى. قازىر ا. بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنىڭ جۋرناليستيكا بولىمىندە ءدارىس بەرەدى.

 ناعاشىباي مۇقاتوۆ ليريك اقىن رەتىندە تانىمال. ول قازاق راديوسى ۇيىمداستىرعان «قازاقستانىم - قارا شاڭىراعىم» اتتى تۇڭعىش رەسپۋبليكالىق راديو فەستيۆالىنىڭ باس جۇلدەسىن جەڭىپ الدى.

اقىن «سويلە، جۇرەك»، «اينالايىن ادامدار»، «اق بۇلاق»، «جانىمنىڭ جاسىل جاپىراقتارى» ولەڭدەر جيناعىنىڭ اۆتورى. سونداي-اق «وي وتاۋدا وڭاشا»، «كوكىرەك كوزبەن كورگەندەرىم» (وي-تولعامدار)، «بەيسەنباي بيىك بايتەرەك» (دەرەكتى اڭگىمە)، «قانات جانە قالامقاس»، «بەكزات اعا، سانجار ءىنى» (بالالارعا ارنالعان ولەڭدەر)، «كۇلكىم كەلەدى» (ساتيرالىق ينتەرمەديالار)، «قازىنالى قاينەكەي» (عىلىمي مونوگرافيا) دەپ اتالاتىن كىتاپتارى جارىق كورگەن. قالامگەر كورنەكتى اقىن، ادەبيەتشى، اۋدارماشى، قوعام قايراتكەرى، قازاق پوەزياسىنا وقيعالى ولەڭدى (باللادا) ورنىقتىرىپ، جەتىلدىرۋشى قاينەكەي جارماعانبەتوۆتىڭ ادەبي باي مۇراسىنان كانديداتتىق ديسسەرتاتسيا قورعاعان.

ناعاشىباي مۇقاتوۆ «كەڭەس وداعى تەلەديدارى مەن راديوسى قىزمەتىنىڭ ۇزدىگى» بەلگىسىمەن، استانانىڭ 10 جىلدىق مەرەكەلىك مەدالىمەن ماراپاتتالعان. ول - قازاقستان رەسپۋبليكانىڭ مادەنيەت قايراتكەرى. قوستاناي وبلىستىق مەتسەناتتار كلۋبى تاعايىنداعان «قازىنا» سىيلىعىنىڭ ەكى مارتە يەگەرى.

اۆتور: ايدىن بايمەن