قىتايداعى اقشا ەسەپتەگىش اپپاراتتار قولما- قول اقشانى «ۇرلاي الادى» - بەينە

استانا. قازاقپارات - قىتايدا بانكتەردەن قولما- قول اقشا الۋ قاۋىپتى ىسكە اينالۋدا.

سەبەبى مۇندا ورناتىلعان بانكنوتا ەسەپتەگىش قۇرىلعىلار اقشا «ۇرلاي الاتىنى» انىقتالدى.

بۇل تۋرالى epochtimes.ru حابارلايدى.

بۇل تۋرالى تۇسىرىلگەن بەينەروليك عالامتوردا بار. ودان اپپاراتقا ەسەبىن الۋ ءۇشىن قويىلعان قاعاز اقشالاردىڭ جوعالعاندىعىن انىق كورە الاسىز. باستاپقىدا ەر ادام قۇرىلعى ارقىلى 40 دانا قاعاز اقشانى وتكىزدى.

اپپارات سونشا دانا اقشانى ساناپ شىعاردى. ونىڭ ديسپلەيىندە «40» دەگەن جازۋ جاندى. ارتىنشا سەنىمدىلىك ءۇشىن بۇل ارەكەت تاعى ءبىر رەت قايتالانىپ، 40 بانكنوتا ەكەندىگىنە تولىق كوز جەتتى. ارتىنشا ەر ادام الىستان باسقارۋشى پۋلتتى الىپ، ونىڭ بويىنداعى تەتىكتى باستى. ال بۇل جولى ديسپلەيدەگى جازۋ 30 سانىن كورسەتتى.

ودان سوڭ سالعان كەزدە قاعاز اقشا سانى كەمي ءتۇسىپ، 24 كە دەيىن ازايدى. ەر ادام ءوز ارەكەتىن قايتالاعان سايىن بانكنوتالار سانى كەمىپ، كەمىپ 22, 18, 16, 13, 12, 11 بولىپ، اقىرىندا، 10 عا جەتتى. سىناقتى جۇرگىزۋشى اقشانى الىپ قولىمەن ساناپ تا شىقتى. راسىندا دا تەك 10 بانكنوتا قالدى. ول اقشا ساناعىش قۇرالدى توڭكەرىپ، ونىڭ «قۇپيا» قۋىسىنان اقشالار شىققان كەزدە باعانادان بەرى جوعالعان 30 بانكنوتانىڭ قايدا جاسىرىلعانى انىقتالدى. دۇكەنشىلەر مەن بانك قىزمەتكەرلەرىنەن سۇراستىرا كەلە، ماسەلەنىڭ ءبارى الىستان باسقارۋ پۋلتىندە ەكەندىگى بەلگىلى بولدى. ونىڭ تەتىكتەرىن باسۋ ارقىلى بانكنوتالار سانىن رەتتەپ وتىرۋعا بولادى ەكەن. بۇل بەينەروليكتى كورگەن تۇتىنۋشى حالىقتىڭ باسىم بولىگى ءامياندارىنىڭ جاعدايىن ويلاپ، ءبىراز قوبالجىپ قالدى.

www.24.kz