بايقوڭىرداعى «پروتون» اپاتىنا كىنالىلەرگە ايىپ تاعىلدى

استانا. قازاقپارات - رەسەيدىڭ تەرگەۋ كوميتەتى حرۋنيچيەۆ اتىنداعى مەملەكەتتىك عارىش عىلىمي- وندىرىستىك ورتالىعىنىڭ باقىلاۋشى شەبەرىنە ايىپ تاقتى، - دەپ جازادى «يزۆەستيا».

بۇل - 2013 - جىلى «بايقوڭىردا» قۇلاپ قالعان «پروتون- م» زىمىرانىن جاساپ شىعارعان ورتالىق.

تەرگەۋ كوميتەتى «بايقوڭىر» عارىش ايلاعىندا ءۇش سپۋتنيگى بار «پروتون- م» زىمىران تاسىعىشىنىڭ اپاتقا ۇشىراۋىن ەكى جىل بويى تەرگەدى. 10 ناۋرىز كۇنى حرۋنيچيەۆ اتىنداعى ورتالىقتىڭ باقىلاۋشى شەبەرى ديانا گۋدكوۆاعا ر ف ق ك 216-بابى («جۇمىس جۇرگىزۋ كەزىندە قاۋىپسىزدىك ەرەجەلەرىنىڭ بۇزىلۋى») العاشقى ايىپ رەسمي تۇردە تاعىلدى.

تەرگەۋشىلەردىڭ مالىمەتىنشە، اقاۋعا گۋدكوۆانىڭ سالعىرتتىعى سالدارىنان جول بەرىلگەن. كىناسى دالەلدەنسە، ول ءۇش جىلعا دەيىن باس بوستاندىعىنان ايىرىلۋى مۇمكىن. باقىلاۋشى شەبەر بولسا، وزىنە تاعىلعان كىنانى مويىندامايدى، ول زىمىراندى تاپسىرۋ كەزىندە قۇرالداردىڭ دۇرىس ورنالاستىرىلعانىن ايتىپ وتىر، قابىلداپ الۋ جۋرنالىنا دا گۋدكوۆا سولاي جازىپ بەرگەن. ونىڭ ايتۋىنشا، بۇرىن زىمىراننىڭ ساپاسىن باقىلاۋ ەكى كەزەڭمەن جۇرگىزىلگەن: حرۋنيچيەۆ اتىنداعى ورتالىقتان سوڭ اسكەري قابىلداۋ اتالاتىن ءراسىم جۇرگىزىلەتىن. ءبىراق «پروتون- م» قۇراستىرىلاردان بۇرىن ول تەكسەرۋ الىپ تاستالدى.

ءىس فيگۋرانتتارى قاتارىنا حرۋنيچيەۆ اتىنداعى ورتالىقتىڭ تاعى ەكى قىزمەتكەرى دە قوسىلىپ وتىر، ولار: قۇراستىرۋشىلار ەۆگەني پروحوروۆ پەن دەنيس گريشين.

تەرگەۋ زىمىراننىڭ قۇلاۋ سەبەبىن 1,5 جىل بويى انىقتاپ، كىنالىلەردى تاپقان. قىلمىستىق ءىس شەڭبەرىندە بىرنەشە مەملەكەتتىك ساراپتاما جۇرگىزىلدى، ونىڭ ناتيجەسىندە زىمىران اپاتىنا بۇرىشتىق جىلدامدىقتار تەتىكتەرىنىڭ دۇرىس ورنالاستىرىلماۋى سەبەپ بولعانى انىقتالدى.

ەسكە سالايىق، 2014 -جىلدىڭ 2 شىلدەسىندە «بايقوڭىر» عارىش ايلاعىنان ءۇش «گلوناسس- م» اپپاراتى بار «پروتون- م» زىمىران تاسىعىشى ۇشىرىلعان ەدى. سورەدەن كوتەرىلگەننەن كەيىن زىمىران بىردەن ۇشۋ باعىتىنان اۋىتقىپ، اۋادا بولشەكتەنە باستادى دا، جارىلعاننان كەيىن سورەدەن الىس ەمەس جەرگە بارىپ قۇلادى. قازاقستان تاراپى اپات سالدارىنان قورشاعان ورتاعا كەلگەن زالال كولەمى 13 ميلليارد تەڭگەدەن اسادى دەپ باعالادى.

tengrinews.kz