تىنىق مۇحيتىندا جانارتاۋ اتقىلاپ، جاڭا ارال پايدا بولدى - فوتو
ارالدىڭ ۇزىندىعى - 1,8 شاقىرىم، ەنى - 1,2 شاقىرىم. عالىمداردىڭ ايتۋىنشا، ارال كوپ ۇزاماي عايىپ بولادى، توپىراعى ۇگىتىلىپ، قايتا مۇحيت تۇبىنە شوگەدى. سەبەبى - ارال قۇرامى قارا توپرىقتان تۇراتىن جانارتاۋ قالدىقتارىنان قۇرالعان، ال قارا توپىراق بىرىكپەيتىندىكتەن تەز ۇگىتىلەدى.
حۋنگا تونگا-حۋنگا حاپاي جانارتاۋى وتكەن جىلدىڭ جەلتوقسانىندا اتقىلاي باستاعان. سول ماڭنان وتكەن كەمەدەگىلەر مۇحيت تۇبىنەن اتقىلاعان گازدى كورىپ، قايران قالعان. اراعا بىرنەشە كۇن سالىپ، عارىشتان تۇسىرىلگەن سۋرەتتەردەن مۇحيتتا جاڭا ارال پايدا بولعانى بايقالعان.
جەرگىلىكتى قوناق ۇيلەردىڭ ءبىرىنىڭ باسشىسى دجانپەرو ورباسسانو (Gianpiero Orbassano) دوستارىمەن بىرلەسىپ، ارالدى سۋرەتكە ءتۇسىرىپ قايتقان. ورباسسانونىڭ ايتۋىنشا، ارالدىڭ توپىراعى قازىردىڭ وزىندە قاتىپ ۇلگەرىپتى، ال بەتكى قاباتىنداعى ىستىعى ءالى باسىلماعان. تۋريستەر كراتەردىڭ ەڭ جوعارعى نۇكتەسىنە دەيىن جەتىپ، ارالدىڭ ءدال ورتاسىندا كۇكىرت ءيىستى جاسىل كولشىكتى بايقاعان.
ايتا كەتۋ كەرەك، 2013-جىلدىڭ قاراشاسىندا جاپونيانىڭ وگاساۆارا ارالىنا جاقىن ماڭدا تەڭىز استىنان جانارتاۋ اتقىلاپ، جاڭا ارال پايدا بولعان. 2014-جىلى بۇل ارال ىرگەلەس جاتقان نيسينوسيما ارالىنا قوسىلىپ، ول ورىندا 1,26 شارشى شاقىرىم ارال تۇزىلگەن.