امانتاي قاجى پرەزيدەنت سايلاۋىنا قاتىسۋعا قۇجات تاپسىردى
«ءيا، ءوتىنىش بەردىم، ولار تىركەۋگە الدى. ولار ماعان حابارلايتىن بولادى»، - دەدى ءوزىن- ءوزى ۇسىنۋشى. ول قازاق ءتىلىن مەڭگەرگەندىگى تەكسەرىلەتىن ەمتيحانعا قۋانا- قۋانا كەلەتىنىن ايتتى.
ەسكە سالايىق، بۇعان دەيىن Tengrinews.kz تىلشىسىنە تەلەفون ارقىلى بەرگەن سۇحباتىندا امانتاي قاجى بيىلعى سايلاۋعا قاتىسۋ نيەتى بارىن ايتقان ەدى. «ەگەر اللا قولداسا، ءبىز پرەزيدەنت سايلاۋىنا ءتورتىنشى رەت قاتىساتىن بولامىز. وعان سەمەي پوليگونىن جابۋعا قول جەتكىزگەن ءبىزدىڭ بۇكىل قازاقستاندىق انتيادرولىق قوزعالىستىڭ «اتتان، قازاقستان!» حالىقتىق بەيبىتشىلىك مارشىنىڭ باعدارلاماسىمەن قاتىسامىز»، - دەگەن بولاتىن امانتاي قاجى.
امانتاي قاجى 2011 - جىلعى سايلاۋ كەزىندە دە ءوزىن- ءوزى ۇسىنىپ، ورتالىق سايلاۋ كوميسسياسىنا ءوتىنىش بەرگەن بولاتىن. ءبىراق ول ۇمىتكەر رەتىندە تىركەلمەدى.
امانتاي قاجى ورتالىق سايلاۋ كوميسسياسى وتكىزگەن ەمتيحانعا كەلمەي، ۇيالى تەلەفونىن ءوشىرىپ تاستاعان ەدى. كەيىن ول وتباسىنداعى قايعىلى وقيعاعا بايلانىستى ەمتيحانعا قاتىسا الماعانىن ايتتى.
2011 - جىلى سايلاۋالدى كامپانياسى بارىسىندا امانتاي قاجى بىرنەشە اتىشۋلى مالىمدەمە جاسادى. ول پرەزيدەنت سايلاۋىندا جەڭىسكە جەتسە، قازاقستاننىڭ تۇرمىسقا شىقپاعان قىزدارىنىڭ ماسەلەسىمەن اينالىساتىن اقساقالدار كەڭەسىن قۇرۋعا ۋادە بەردى. ول ءوز ماقساتىن رەسپۋبليكا بيۋدجەتى ەسەبىنەن ىسكە اسىرعىسى كەلەتىنىن ايتتى.
امانتاي قاجى - «نەۆادا - سەمەي» قوزعالىسى ۇيىمداستىرۋشىلارىنىڭ ءبىرى. 2005 - جىلعى سايلاۋدا ول ورتالىق سايلاۋ كوميسسياسىنا پرەزيدەنتتىككە ۇمىتكەر رەتىندە تىركەلدى. اقپارات قۇرالدارىنا بەرگەن سۇحباتتارىنىڭ بىرىندە ول ءوزىن «مافيامەن، سىبايلاس جەمقورلىقپەن جانە اتوم ەلەكتر ستانسيالارىمەن كۇرەسۋشى الەمدىك كوسەم» دەپ اتادى.