كاسىپوداقتار فەدەراتسياسىنىڭ ءتوراعاسى ءا. قۇسايىنوۆ سايلاۋ ناۋقانىنا قاتىساتىنى جونىندە مالىمدەدى - كەسكىن

استانا. قازاقپارات - ق ر كاسىپوداقتار فەدەراتسياسىنىڭ ءتوراعاسى ءابىلعازى قۇسايىنوۆ كەزەكتەن تىس پرەزيدەنتتىك سايلاۋعا قاتىسۋعا ءوتىنىش ءبىلدىردى.

بۇل تۋرالى بۇگىن ق ر ورتالىق سايلاۋ كوميسسياسى ءتوراعاسىنىڭ ورىنباسارى ۆلاديمير فوسس ءمالىم ەتتى.

ءا. قۇسايىنوۆ 1952 - جىلى 6 - اقپاندا قاراعاندى وبلىسى تەلمان اۋدانىنىڭ مايوزەك كەنتىندە تۋعان. قاراعاندى پوليتەحنيكالىق ينستيتۋتىن، رەسەي باسقارۋ اكادەمياسىن بىتىرگەن. ماماندىعى بويىنشا - ينجەنەر- مەحانيك، ساياساتتانۋشى. ەڭبەك جولىن كۋزنەسك مەتاللۋرگيالىق كومبيناتىندا بەتون قۇيۋشى بولىپ باستادى.

«قاراعاندى كومىر» كومبيناتىندا بۇرعىشى، شاحتا كەنشىسى بولىپ جۇمىس جاسادى. قاراعاندى وبلىسىنىڭ مەملەكەتتىك باسقارۋ ورگاندارىندا باسشىلىق قىزمەتتەر اتقاردى.

سونىمەن قاتار ول ق ر پارلامەنتى سەناتىنىڭ دەپۋتاتى، پارلامەنت سەناتى ءتوراعاسىنىڭ ورىنباسارى بولىپ سايلانعان. ق ر كولىك جانە كوممۋنيكاتسيا مينيسترلىگى اۆتوموبيل جولدارى كوميتەتىنىڭ ءتوراعاسى، كولىك جانە كوممۋنيكاتسيا ۆيتسە- ءمينيسترى، ەكونوميكا، يندۋستريا جانە ساۋدا ۆيتسە- ءمينيسترى، ق ر يندۋستريا جانە ساۋدا مينيسترلىگى تەحنيكالىق رەتتەۋ جانە مەترولوگيا كوميتەتىنىڭ ءتوراعاسى، كولىك جانە كوممۋنيكاتسيا ءبىرىنشى ۆيتسە-ءمينيسترى بولىپ جۇمىس جاسادى. ق ر كولىك جانە كوممۋنيكاتسيا مينيسترلىگىنىڭ جاۋاپتى حاتشىسى بولدى. 2009 - جىلعى ناۋرىزدان 2011 - جىلعى ساۋىرگە دەيىن ق ر كولىك جانە كوممۋنيكاتسيا مينيسترلىگىن باسقاردى.

ال 2011 -جىلدان 2013 -جىلعا دەيىن قاراعاندى وبلىسىنىڭ اكىمى بولدى. قازىرگى ۋاقىتتا - ق ر كاسىپوداقتار فەدەراتسياسىنىڭ ءتوراعاسى. «قۇرمەت» وردەنىمەن، سونداي-اق مەدالدارمەن ماراپاتتالعان.

اۆتور: مارلان جيەمباي