ن. نازاربايەۆ: سايلاۋ ءبىزدىڭ باعىتىمىزدى جالعاستىرۋعا دەگەن جالپى حالىقتىق ۇمتىلىس پەن دالەل بولىپ وتىر
ءسوز اراسىندا ەلباسى سەز دەلەگاتتارى مەن قوناقتارىنا العىسىن ايتىپ، بايتاق قازاق دالاسىنىڭ بارلىق ايماقتارىن قامتيتىن 850 مىڭ پارتيا مۇشەسىنىڭ اتىنان كەلگەندەرگە ريزاشىلىعىن ءبىلدىردى.
«مەن بارشا پارتيالاس سەرىكتەرىمىزگە ەلىمىزدىڭ گۇلدەنۋى مەن ءوسىپ-وركەندەۋىنە توگىلگەن ولشەۋسىز تەر مەن ورتاق پاتريوتتىق ەڭبەكتەرىڭىز ءۇشىن تاعى ءبىر رەت زور ريزاشىلىعىمدى بىلدىرەمىن»، - دەدى ن. نازاربايەۆ.
بۇدان بولەك، پرەزيدەنت الدا قازاقستان ءۇشىن تاعى ءبىر تاعدىرلى تاريحي ناۋقان تۇرعانىن اتاپ ءوتتى.
«ءبىز ءبىر ورىندا تۇرماي، العا جىلجۋىمىز كەرەك. توقتاپ قالۋعا بولمايدى. توقتاپ قالعان سۋ بۇزىلادى، ءبىر ورىندا تۇرساق، ارتتاعىلار وزىپ كەتەدى. قازاقستان حالقى اسسامبلەياسىنىڭ كەزەكتەن تىس پرەزيدەنتتىك سايلاۋ وتكىزۋ تۋرالى باستاماسى حالىق تاراپىنان قىزۋ قولداۋ تاپقانىن ءبىلىپ وتىرسىزدار. ساناۋلى كۇندە ماعان وسى ماسەلە جونىندە مىڭداعان حاتتار كەلىپ ءتۇستى. قۇزىرلى ورگاندار بۇل باستامانى ەل زاڭناماسىنا سايكەس دەپ تاپتى. سونىمەن، 26- ساۋىردە كەزەكتەن تىس پرەزيدەنت سايلاۋىن وتكىزۋ تۋرالى جارلىعىم وسىعان جاۋاپ بولدى. بۇنى وتانىمىزدا بەيبىتشىلىك پەن كەلىسىمدى نىعايتۋعا، ءبىزدىڭ باعىتىمىزدى جالعاستىرۋعا دەگەن جالپى حالىقتىق ۇمتىلىس پەن دالەل دەپ ءبىلۋىمىز كەرەك»، - دەي كەلە ەلباسى وسى باستامانى كوتەرگەن قازاقستان حالقى اسسامبلەياسى مەن ونى قولداعان بارشا ازاماتتارعا ريزاشىلىعىن ءبىلدىردى.
اۆتور: قانات مامەتقازى ۇلى