توڭكەرىلگەن تۋ ءۇشىن ۋنيۆەرسيتەتتى «توڭكەرگەن» قىز
قۇدايعا شۇكىر، ەلگە، وتانعا دەگەن كىرشىكسىز ماحابباتى، تۇنىق سەزىمى بار، مەملەكەتتىك رامىزدەردىڭ ءمان- ماعىناسىن تەرەڭ تۇسىنەتىن جاس ۇرپاق قاۋلاپ ءوسىپ كەلەدى. سولاردىڭ ءبىرى - ريزاگۇل مەيرام قىزى.
ريزاگۇل مالايزيانىڭ استاناسى كۋالا- لۋمپۋردەگى INTI حالىقارالىق بريتان- مالاي بىرلەسكەن ۋنيۆەرسيتەتىندە حالىقارالىق بيزنەس ماماندىعىن وقيتىن ءبىرىنشى كۋرس ستۋدەنتى. ۋنيۆەرسيتەتتىڭ ءبىر ەرەكشەلىگى وزدەرىندە قاي ەلدىڭ ستۋدەنتى بار بولسا، سول ەلدىڭ تۋىن ءىلىپ قوياتىن. سولاردىڭ قاتارىندا ءبىزدىڭ كوكبايراعىمىز دا تۇر. سەبەبى، وقۋ ورنىندا قازاقستاننان 17 ستۋدەنت ءبىلىم الادى.
ايتايىن دەپ وتىرعانىمىز وسىدان بىرەر اي بۇرىن بولعان وقيعا. يگىلىكتىڭ ەرتە- كەشى جوق. بۇنداي ونەگەلى، ۇلگىلى ىستەردى ءار ۋاقىت سانادا جاڭعىرتىپ، جابىلا جاريالاپ وتىرۋ ۇرپاق ءۇشىن پايداسىن بەرمەسە، زيانىن تيگىزبەيتىنى انىق. سونىمەن...
ءبىر كۇنى ساباققا كەلە جاتقان ريزاگۇل ءوزى كۇندە قاراپ وتەتىن كوكتۋىمىزدىڭ توڭكەرىلىپ، تەرىس ءىلىنىپ تۇرعانىن كورەدى. قاز- قاتار قويىلعان ەلۋ شاقتى ەلدىڭ بايراعىنىڭ اراسىندا جالاۋىمىز تومەن قاراپ قالعان. تۋدى جاڭالاعاندار، نە الدەبىر سەبەپپەن قايتا ىلگەندەر قاتەلەسىپ كەتسە كەرەك. كوكبايراقتىڭ مۇنداي كۇيىن كورگەن ول دەرەۋ سۋرەتكە ءتۇسىرىپ، اكەسىنە جىبەرەدى جانە نە ىستەۋگە بولادى دەپ ءجون سۇرايدى. قىزىنىڭ جىبەرگەن فوتوسىن كورىپ، جاعدايدى اڭعارعان اكەسى مەيرام اعا «سەن ءوز ەلىڭنىڭ تۋى مىناداي كۇيدە تۇرعاندا وعان ءبىر سەكۋند تا بەيجاي قاراپ تۇرماۋىڭ كەرەك، تەز بارىپ ۋنيۆەرسيتەتتىڭ اكىمشىلگىنە، مۇعالىمدەرىڭە ەسكەرت، تۋدى دۇرىستاپ ءىلدىر» دەيدى.
ايتقانداي، ريزاگۇل تۋدىڭ تەرىس ىلىنگەگىن ۇستازدارىنا ەسكەرتەدى. الايدا، بۇل وقيعاعا سالعىرت قاراعان مۇعالىمدەر اسا ءمان بەرمەگەن سەكىلدى. ەكىنشى كۇنى تۋ سول قالپى تۇر ەكەن. بۇنى كورگەن ريزاگۇل رەكتوردىڭ كابينەتىنە تۋرا تارتادى. ءبىراق، كۇزەتشىلەر جىبەرمەي قويعان سوڭ، نامىس پەن اشۋ قىسقان قارىنداسىمىزدىڭ داۋىسى قاتتى شىعىپ، جان ۇشىرعان ءۇنى رەكتوردىڭ كابينەتىنە ەستىلەدى. سول ارادا رەكتور كومەكشىلەرىمەن شىعىپ، وقيعانىڭ ءمان- جايىن تۇسىنگەن سوڭ، تەز ارادا قازاقستاننىڭ كوكتۋىن دۇرىستاپ قايتا ىلدىرەدى. سونىمەن قاتار، رەكتوردىڭ ءوزى دە جىبەرگەن اعاتتىق ءۇشىن قازاق قىزىنان عاپۋ ءوتىنىپ، ەل نامىسى، وتان ابىرويى دەپ شىر- پىر بولعان ستۋدەنتىنە ريزالىعىن بىلدىرەدى.
ءبىر قاراعاندا بۇل قاراپايىم ءىس سياقتى كورىنۋى مۇمكىن. الايدا ريزاگۇلدىڭ ارەكەتى ءوز ەلىن شىن سۇيگەن قازاق جاستارىنىڭ جارقىن وبرازى، بۇگىنگى ساۋلەلى بەت- بەينەسى دەسەك قاتەلەسپەيمىز. پاتريوتتىقتى ايقايلاپ ءجۇرىپ ىستەگەننەن گورى، ءۇنسىز عانا جاساعان سۇيكىمدى بولماق. سونداي سۇيكىمدى ءىس اتقارعان ريزاگۇل قارىنداسىمىز قازاق جاستارىنىڭ پاتريوت بولاتىنىن مالايزيا وقۋ ورنىنىڭ باسشىلىعى مەن مۇعالىمدەرىنە، ستۋدەنتتەرگە تانىتا ءبىلدى.
شىنى كەرەك، كەي ساتتەرى جاستارىمىزدىڭ اراسىندا وزگە ەلدىڭ جالت- جۇلت ادەت- سالتىنا ەلىكتەيتىن مىنەز كەزىگىپ قالادى. ريزاگۇلدىڭ ءىسى كەرىسىنشە، وزگە ەلدىڭ جاستارىن قازاق جاستارىنىڭ ەلىن سۇيەر پاتريوتتىعىنا ەلىكتەۋگە شاقىراتىن مەرەيلى ءىس بولدى. قارىنداسىمىزعا وقۋىن ءساتتى اياقتاپ، ەل ەكونوميكاسى ءۇشىن قىزمەت ەتەتىن مىقتى مامان بولۋىن تىلەيمىز. جانە وسىنداي ونەگەلى ۇرپاق تاربيەلەگەن اتا- اناسىنا دا راحمەت ايتامىز.
مۇرات الماسبەك ۇلى