استانادا قىتايدان كەلگەن قازاق ونەرپازدارىنىڭ «ەلگە سالەم» اتتى كونسەرتى وتەدى
قىتايداعى ەڭ العاشقى قازاق پروديۋسەرلىك ورتالىعىن قۇرۋشى، كاسىپكەر ەربوسىن نۇرمۇحاننىڭ ۇيىمداستىرۋىمەن وتەتىن كونسەرتتە قىتايداعى قازاق ەستراداسىنىڭ جۇلدىزدارى احمەتجان رابجان، اينۇر قاجيموللا، «دوس» توبى، جانە مۇباراك قايراتبەك باستاعان تانىمال انشىلەر جاندى داۋىسپەن ەسترادالىق جانە ءداستۇرلى باعىتتا ونەر كورسەتپەك. الماتى، وسكەمەن قالالارىندا «ەلگە سالەم» دەگەن اتپەن كولەمدى كونسەرتتەر وتكىزىپ ۇلگەرگەن شىعارماشىلىق توپتىڭ جەتەكشىسى، پروديۋسەر ەربوسىن نۇرمۇحاننىڭ ايتۋىنشا، كونسەرتتىڭ ماقساتى - الەمدەگى قازاقتاردى اتاجۇرتىنا شاقىرۋ، شەتتە جۇرگەن قازاق ونەرپازدارىن ەلگە تانىتۋ بولماق.
ايتا كەتەيىك، كەشتىڭ ۇيىمداستىرۋشىسى ەربوسىن نۇرمۇحان - «قازاق كونسەرت» بىرلەستىگىنىڭ ونەرپازدارىن، «مۋزارت» پەن «شانشار» سياقتى ورەلى ونەر توبى مەن تەاترلاردى قىتاي قازاقتارىمەن ءجيى جۇزدەستىرىپ جۇرگەن، ءشامشى قالداياقوۆ پەن مۇقاعالي ماقاتايەۆتى ەسكە الۋ كەشتەرىن قىتايدا وتكىزگەن جانە مارقۇم ورازالى دوسبوسىنوۆ باستاعان ايتىستىڭ اقتاڭگەرلەرىن الىستاعى اعايىندارمەن قاۋىشتىرعان ازامات. بۇل كۇندە اتاجۇرتىنا ورالعان قانداسىمىز كونسەرت ۇيىمداستىرۋ، كونسەرتتەرگە تەحنيكالىق قىزمەت كورسەتۋ، قىتاي مەن قازاق ەلى اراسىنداعى مادەني بايلانىستى نىعايتۋ جولىنداعى جۇمىسىنان جاڭىلمادى.
قازىرگى كەزدە ول قۇرعان «جىبەك جولى - شوۋ تەحنيكا» كومپانياسى ەلىمىزدەگى ۇلكەن دەڭگەيدەگى مەرەكەلىك شارالاردىڭ وتۋىنە بەزەندىرۋ، شوۋ، اكۋستيكا، LED ەكران بويىنشا ەڭ جاڭا تەحنيكالارمەن اتسالىسىپ ءجۇر. كوپ ۇزاماي استانا قالاسىنان ءوزىنىڭ پروديۋسەرلىك ورتالىعىن دا اشپاق بولىپ جاتقان ەربوسىن مىرزانىڭ بيىلعى جىلعى جوسپارىنا بەلگىلى جاس ءانشى احمەتجان رابجاننىڭ جەكە شىعارماشىلىق كەشىن وتكىزۋ دە ەنىپتى.