ت. سىزدىقوۆ ق ر پرەزيدەنتتىگىنە كانديدات رەتىندە تىركەلدى

استانا. قازاقپارات - بۇگىن ق ر ورتالىق سايلاۋ كوميسسياسىنىڭ وتىرىسى ءوتىپ، وندا قازاقستاننىڭ كوممۋنيستىك حالىق پارتياسى اتىنان ق ر پرەزيدەنتتىگىنە ۇمىتكەر تۇرعىن سىزدىقوۆتى كانديدات رەتىندە تىركەۋ تۋرالى قاۋلى قابىلداندى.

«قاۋلى بويىنشا ق ر پرەزيدەنتتىگىنە كانديدات تۇرعىن ىسقاق ۇلى سىزدىقوۆ ق ر كونستيتۋتسياسىنا جانە «قازاقستان رەسپۋبليكاسىنداعى سايلاۋ تۋرالى» 1995 - جىلعى 28 - قىركۇيەكتەگى كونستيتۋتسيالىق زاڭنىڭ تالاپتارىنا سايكەس دەپ انىقتالسىن. ت. سىزدىقوۆقا ق ر پرەزيدەنتتىگىنە كانديداتتىعىن قولداپ، قول جيناۋ ءۇشىن قول قويۋ پاراقتارى بەرىلسىن»، - دەدى قاۋلى جوباسىن تانىستىرعان وسك مۇشەسى باقىت مەلدەشيەۆ.

ونىڭ اتاپ وتۋىنشە، ق ر و س ك ەلىمىزدىڭ باس پروكۋراتۋراسى مەن ىشكى ىستەر مينيسترلىگىنە اتالعان كانديداتتىڭ قۇجاتتارىن جىبەرگەن.

«ولاردان كەلىپ تۇسكەن انىقتامالارعا سايكەس بۇل ازامات 1947 - جىلى 2 - تامىزدا س ق و- دا دۇنيەگە كەلگەن. ق ر پرەزيدەنتتىگىنە كانديداتتىڭ مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكالىق كوميسسيانىڭ قورىتىندىسى بويىنشا سىزدىقوۆ مەملەكەتتىك ءتىلدى ەركىن مەڭگەرگەن.

ق ر ءى ءى م ۇسىنعان انىقتاماعا ساي بۇل ازامات ەلىمىزدە 67 جىل تۇرادى. بەلسەندى سايلاۋ قۇقىعىنا يە. باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنەن كەلىپ تۇسكەن قۇجاتقا ساي ت. سىزدىقوۆ زاڭمەن بەلگىلەنگەن تارتىپپەن وتەلمەگەن جانە الىنىپ تاستالعان سوتتىلىعى جوق»، - دەدى ول.

ق ر ورتالىق سايلاۋ كوميسسياسىنىڭ مۇشەلەرى قاۋلى جوباسىنا ءبىراۋىزدان قولداپ داۋىس بەردى.

اۆتور: مارلان جيەمباي