قازاقستاندا جاسالعان: الماتىدا عالىمدار قارتايۋدى باياۋلاتاتىن ءدارى ويلاپ تاپتى
بۇل - ەلىمىزدەگى عىلىمي تۇرعىدان نەگىزدەلگەن، راسىمدەلگەن جالعىز پرەپارات.
جاڭا بىرەگەي جوبا تۋرالى قازاقپارات تىلشىسىنە عالىمدار توبىنىڭ مۇشەسى،
قازاقستان- رەسەي مەديتسينالىق ۋنيۆەرسيتەتىنىڭ عىلىم، حالىقارالىق قاتىناستار، كاسىبي مەديتسينالىق مامانداردى دايارلاۋ دەپارتامەنتىنىڭ ديرەكتورى الما ءمانشارىپوۆا ايتىپ بەردى.
«يۋۆەلاكس» مايلى بالزامى انتيوكسيدانتتىق قاسيەتتەرىمەن بەلگىلى شيكىزاتتار: قالاقاي، اسقاباق، پالما، بيداي، بۇرگەن داندەرىنەن جاسالعان.
دارمەك جاسۋشالار مەن تىندەردىڭ زاقىمدانۋىن ازايتىپ، قايتا قالپىنا كەلۋىن، ەركىن راديكالدى رەاكسيالاردىڭ تەڭدىگىن قامتاماسىز ەتەدى. اعزاداعى ماي الماسۋىن رەتتەيدى.
الما ءمانشارىپوۆانىڭ ايتۋىنشا، عىلىمي جۇمىس 2009 - جىلدان بەرى جالعاسىپ كەلەدى. جاڭا دارمەك ءبىرقاتار ساراپتاۋلار مەن تەكسەرۋدەن ءساتتى ءوتىپ، وندىرۋشىلەر ق ر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ رۇقساتىن الدى. ەندى ونى كەدەندىك وداق اياسىندا ءوندىرىپ ساتۋعا زاڭ رۇقسات ەتىپ وتىر.
«ءبىز عالىم رەتىندە ەگدە جاستاعى ادامدارعا قولجەتىمدى قانداي ءونىم ۇسىنا الاتىنىمىزدى ويلاستىردىق. ءبىز قازاقستاندىقتاردىڭ بارلىعىنا پايدا كەلتىرەتىن دۇنيە جاساۋدى ۇيعاردىق. «يۋۆەلاكس» ءدارى ەمەس، ول بيولوگيالىق بەلسەندى قوسىندى بولىپ تابىلادى»، - دەدى پروفەسسور.
جاڭا ءونىم حالىق اراسىندا سۇرانىسقا يە بولدى. وتكەن جىلدىڭ وزىندە قۇنى 700-800 تەڭگە بولاتىن 1500 قۇتى ساتىلدى. قازىر عالىمدار عىلىمي- كلينيكالىق زەرتتەۋ جۇمىستارىنان وندىرىسكە بەت الدى. بولاشاقتا ءونىمنىڭ قۇنىن ودان دا تومەندەتۋ جوسپاردا بار.
اۆتور: گۇلميرا عوسمانالي