ابايدىڭ قارا سوزدەرىن ەجىكتەپ وقىعان ە. سەرعازين كوميسسيا كوڭىلىنەن شىقپادى - م. جولداسبەكوۆ

استانا. قازاقپارات - بۇگىن ق ر پرەزيدەنتتىگىنە كانديداتتاردى مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكالىق كوميسسيا الدىندا سىناق تاپسىرعان ەرجان سەرعازين ءسۇرىندى.

ونىڭ ءۇش كەزەڭدە تاپسىرعان ەمتيحانىنداعى كەمشىلىكتەردى كوميسسيا ءتوراعاسى مىرزاتاي جولداسبەكوۆ جاريا ەتتى.

«ەرجان مەرەكە ۇلى سەرعازين مىرزانىڭ بۇگىن قازاق تىلىنەن تاپسىرعان ەمتيحانىنىڭ ناتيجەسى مىناداي بولدى. ءبىرىنشى جازبا جۇمىسىنىڭ تاقىرىبى: «كونستيتۋتسيا - تۇراقتى دامۋ كەپىلى». ەرجان مىرزا ەكى بەت جۇمىس جازىپتى. جۇمىستىڭ باس جاعىندا اجەپتاۋىر جاقسى تاريحي دەرەكتەر بار. ءبىراق قازىرگى ءبىزدىڭ كونستيتۋتسيامىزدىڭ تۇراقتى دامۋ كەپىلدىگى جايى اشىلماي قالعان. ونىڭ ۇستىنە، جۇمىسىندا 24 قاتە كەتىپتى. ەملەسى - 6، تىنىس بەلگىسى - 13، ستيلدىك قاتە - 5. جالپى، ءبىزدىڭ تالابىمىزدا پرەزيدەنتتىككە ۇمىتكەر ازاماتتار ساۋاتتى جازۋى كەرەك، ساۋاتتى سويلەۋى كەرەك»، - دەدى م. جولداسبەكوۆ.

كانديدات ەكىنشى كەزەڭدە ابايدىڭ پوەزياسى مەن قارا سوزدەرىنەن 3 بەتتىك ءماتىن وقىعان.

«شىنىن ايتۋ كەرەك، ەرجان مىرزا ەجىكتەپ وقىدى. كەيبىر ءماتىننىڭ ماعىناسىن تولىق تۇسىنبەدى. سول ءماتىن ىشىندە كەزدەسەتىن قازاقتىڭ بايىرعى سوزدەرىن، ماسەلەن، قارەكەت، كوكىرەك تازالاۋ سىندى سوزدەردى ءتۇسىندىرىپ ايتا المادى»، - دەدى م. جولداسبەكوۆ.

كوميسسيا ءتوراعاسىنىڭ ايتۋىنشا، ءۇشىنشى كەزەڭدە «قازاق ونەرىنىڭ بەل- بەلەستەرى» دەگەن تاقىرىپتا 15 مينۋت سويلەگەن ە. سەرعازيننىڭ ويى شاشىراڭقى بولعان.

«جالپى، سويلەم قۇراۋى وزگە ءبىر شەتەلدىك ازاماتتىڭ قازاق ءتىلىن جاڭا-جاڭا ۇيرەنىپ جۇرگەنىندەي ەستىلدى. لوگيكا، جۇيە جوق. وسىنىڭ ءبارىن ەسكەرە كەلىپ، كوميسسيا ەرجان مەرەكە ۇلى قازاق ءتىلىن ەركىن مەڭگەرمەگەن دەگەن قورىتىندى شىعارىپ وتىر»، - دەدى ول.

اۆتور: مارلان جيەمباي