پرەزيدەنتتىككە كانديدات ە. ۇكتەشبايەۆ مەملەكەتتىك ءتىلدى ەركىن مەڭگەرگەندىگىن دالەلدەي المادى

استانا. قازاقپارات - بۇگىن ق ر ورتالىق سايلاۋ كوميسسياسىندا قازاقستان رەسپۋبليكاسىنىڭ پرەزيدەنتتىگىنە كانديدات ەسەنبەك جاپار ۇلى ۇكتەشبايەۆتىڭ مەملەكەتتىك ءتىلدى مەڭگەرۋ دەڭگەيىن انىقتاۋ جونىندەگى لينگۆيستيكالىق كوميسسيانىڭ وتىرىسى بولدى.

لينگۆيستيكالىق كوميسسيانىڭ شەشىمىمەن قازاقستان رەسپۋبليكاسىنىڭ پرەزيدەنتتىگىنە كانديدات ەسەنبەك جاپار ۇلى ۇكتەشبايەۆ مەملەكەتتىك ءتىلدى ەركىن مەڭگەرمەگەن دەپ تانىلدى.

لينگۆيستيكالىق كوميسسيانىڭ ءتوراعاسى مىرزاتاي جولداسبەكوۆ كوميسسيانىڭ شەشىمدى اشىق داۋىس بەرۋ ارقىلى كوپشىلىك داۋىسپەن قابىلداعانىن جاريالاپ، ەمتيحان بارىسى تۋرالى ايتىپ بەردى.

«تاڭداعان تاقىرىپتى اشۋ تالاپ ەتىلەتىن جازباشا تاپسىرمادا كانديدات ءوز ويىن قيسىنىنا كەلتىرىپ جەتكىزە المادى، ءسوز تىركەستەرىنىڭ ادەبي نورمالارىن بۇزا وتىرىپ، سويلەمدەردى ستيليستيكالىق جاعىنان دۇرىس قۇرعان جوق. جازباشا تاپسىرمانىڭ كولەمى تالاپ ەتىلەتىن ەكى پاراقتان كەم بولدى»، - دەدى ول.

كوميسسيا ءتوراعاسىنىڭ سوزىنە قاراعاندا، ەكىنشى سىناقتا ۇمىتكەر مۇقاعالي ماقاتايەۆتىڭ «سەزىم» اتتى ولەڭىن وقۋدا دا قاتەلەر جىبەرگەن جانە وقىلعان ولەڭنىڭ مازمۇنى بويىنشا كوميسسيانىڭ قويعان سۇراقتارىنا جاۋاپ بەرە الماعان.

«قوعام جانە دەموكراتيا» دەگەن تاقىرىپتا كوپشىلىك الدىندا ءسوز سويلەۋگە قاجەتتى 15 مينۋتتىڭ ورنىنا كانديدات 10 مينۋت سويلەدى. تاقىرىپتى اشپادى، ادەبي ءتىل نورمالارىن بۇزدى جانە سۇراقتارعا قاناعاتتانارلىقسىز جاۋاپ بەردى»، - دەدى م. جولداسبەكوۆ.

وتىرىسقا قازاقستان رەسپۋبليكاسى ورتالىق سايلاۋ كوميسسياسىنىڭ مۇشەسى ءلاززات سۇلەيمەن دە قاتىستى.

 اۆتور: مارلان جيەمباي