ق ر قورعانىس مينيسترلىگىنىڭ باسپا ءسوز قىزمەتىنەن مالىمدەگەندەي، جارىسقا اقمولا گارنيزونىنىڭ ءتۇرلى بولىمدەرىندە قىزمەت اتقارىپ جۇرگەن قىز-كەلىنشەكتەر قاتىستى. ولاردىڭ ىشىندە بارلىق اسكەر تۇرلەرى مەن تەكتەرىنىڭ، ولاردىڭ ىشىندە قۇرلىق اسكەرلەرى، اسكەري-تەڭىز كۇشتەرى، اۋە قورعانىسى كۇشتەرىنىڭ وكىلدەرى بار. ەرەكشە اسكەر تەگى بولىپ سانالاتىن اەروۇتقىر اسكەرلەرىنىڭ اتىنان ەلوردالىق بريگادانىڭ دەسانتشى قىزدارى سىنعا ءتۇستى.
جارىستىڭ ءبىرىنشى كەزەڭىندە ماكاروۆ تاپانشاسىنان (پ م) اتۋ كوزدەلدى. بۇل رەتتە قىزداردان 25 مەتر قاشىقتىقتا ورنالاسقان نىسانانى ءۇش رەت بارىنشا ءدال نىساناعا الۋ تالاپ ەتىلدى. مۇنداي تالاپتار تاپانشادان وق اتۋدان سىناق تاپسىراتىن وفيتسەرلەر الدىنا دا قويىلادى. ەكسپرەسس- سايىسقا قاتىسۋشىلاردىڭ جارتىسىنان كوبى كەلىسىم-شارت بويىنشا اسكەري قىزمەتشىلەر بولعانىنا قاراماستان، قىزدار اتىستى جاقسى كورسەتكىشتەرمەن وتكىزدى. ۇزدىك ناتيجەلەردى دەسانتتىق-شابۋىلداۋ بريگاداسىنىڭ وكىلدەرى كاپيتان گۇلنار ارالوۆا مەن ەفرەيتور ماقپال حافيزوۆا كورسەتتى.
جارىستىڭ ەڭ قيىن كەزەڭى «اتلەتيزم. باتىلدىق. وتكىرلىك» كەدەرگىلەر جولاعىن (ءا ب و) باعىندىرۋ بولدى. بۇل يدەيانى جاساپ ەنگىزگەن قۇرلىق اسكەرلەرىنىڭ باس قولباسشىسى بولاتىن. ءا ب و جولاعىن باعىندىرۋ بارىسىندا بىرنەشە رەت الداعى 25 كيلوگرامدىق جاشىكتەردى كوتەرۋ، «جارالى» جاۋىنگەردى تاسىمالداۋ، تەرەڭ وردان ءوتۋ، تىكەنەكتى سىم استىنان جەر باۋىرلاپ ەڭبەكتەپ ءوتۋ جانە باسقا دا كۇردەلى ەلەمەنتتەردى ورىنداۋ قاجەت ەدى.
جارىسقا قاتىسۋشىلاردىڭ بىرنەشە تاپسىرمالارىن جەڭىلدەتتى، اۋىر زاتتاردى كوتەرۋدى قىسقارتۋ ارقىلى ەر ازاماتتار قىزمەتتەس ارىپتەستەرىن قورعاۋعا تىرىستى. ءا ب و كەدەرگى جولاعىن باعىندىرۋدا قىزداردىڭ بىرەۋى دە قاشىقتىقتان باس تارتىپ، جارىستان شىعىپ قالعان جوق. مارەگە بارلىعى شامامەن ءبىر ۋاقىتتا كەلدى، سوندىقتان بارلىق جارىسقا قاتىسۋشىلاردىڭ كورسەتكىشتەرىنە 100 ۇپايدان قوسىلدى.
ەكسپرەسس-جارىستى قورىتىندىلاي كەلە دەسانتتىق- شابۋىلداۋ بريگاداسى كومانديرىنىڭ تاربيە جۇمىستارى جونىندەگى ورىنباسارى پودپولكوۆنيك رادجان جانىسوۆ بارلىق قىزداردىڭ سىناقتاردان ابىرويمەن ءوتىپ، ءوز اسكەرلەرىنىڭ نامىسىن لايىقتى قورعاي العانىن جانە وزدەرىن ەر ازاماتتارمەن تەڭ دارەجەدە قىزمەت اتقاراتىن وتان قورعاۋشى دەپ اتاۋعا تولىق قۇقىلى ەكەنىن اتاپ ءوتتى.