ورالدا وڭتايلى اۆتوبۋستارعا دەيىن قۇراستىرۋعا بولادى - فوتو
ونىڭ ايتۋىنشا، ەلباسى وتاندىق كاسىپورىندار الدىنا مىندەت ەتىپ قويىپ وتىرعانىنداي، وندىرىسكە تىڭ سەرپىن بەرەتىن يننوۆاتسيالىق جوبانى جۇزەگە اسىرۋدىڭ ماڭىزى زور. ارينە، ول ءۇشىن الدىمەن جەتى رەت ولشەپ، ءبىر رەت كەسىپ العاننىڭ ارتىعى جوق. ماسەلەن، ۆەنگريالىق «ەۆوپرو» كومپانياسىنىڭ وكىلدەرى «ورال اگرورەم ماش» ا ق- دا بولىپ، مۇندا اۆتوبۋس قۇراستىرۋعا بولاتىنىنا كوزدەرىن جەتكىزىپ كەتتى.
ەندەشە، بۇل اۆتوبۋستىڭ بۇرىنعىلاردان ارتىقشىلىقتارى قانداي، اۋەلى سوعان توقتالايىق. بىرىنشىدەن، ول مەتالل ەمەس، كومپوزيتتىك ماتەريالدان جاسالادى. مودۋل تۇرىندە، جۇرگىزۋشىنىڭ وتىراتىن جەرى، جولاۋشىلارعا ارنالعان ورىن - ءبارى بولەك-بولەك قۇراستىرىلادى. بۇل رەتتە جاڭا ۇلگىدەگى اۆتوبۋس تۇتىنۋشىلارعا نەسىمەن تارتىمدى، ەرتەڭ ول ءوتىمدى بولا ما، ولاردىڭ كوزقاراسى قالاي، مۇنى دا الدىن الا مۇقيات ەسكەرۋ قاجەت. وسى ماقساتتا «ەۆوپرو» وكىلدەرى كەلگەندە، ورالداعى جولاۋشى تاسىمالداۋمەن اينالىساتىن كاسىپورىنداردىڭ باسىن قوسىپ، اقىلداسىلدى. ولار ماقۇلدادى. ەكىنشى ماسەلە مۇنداي اۆتوبۋستاردىڭ بىردەيلىگىندە. ياعني قازىر قىزمەت ەتىپ جۇرگەن اۆتوبۋستاردىڭ ءبىرى «پ ا ز»، ەكىنشىسى «ل ي ا ز»، ءۇشىنشىسى «م ا ز» - دان شىقسا، وعان قوسا جولاۋشىلاردىڭ سىيىمدىلىعىنا قاراي ءار ءتۇرلى بولىپ كەلەدى. ولارعا سىنعان جاعدايدا قوسالقى بولشەكتەردى دە ءار جاقتان ىزدەۋگە تۋرا كەلەدى. ال قۋاتتىلىعىنا قاراي، قوزعالتقىشتارى عانا بولماسا، مودۋلدىك اۆتوبۋستاردىڭ قۇرىلىمى بىردەي. ولاردىڭ قوسالقى بولشەكتەرىن ورالدىق كاسىپورىندار الىستان ىزدەمەي-اق، «ورال اگرورەم ماشتاعى» قويمادان ساتىپ الا الادى.
ۇشىنشىدەن، كومپوزيتتىك ماتەريالدىڭ كورروزياعا ۇشىرامايتىن بەرىكتىگىن ايتۋ كەرەك. ياعني ول تەمىر سياقتى ءشىرىپ كەتپەيدى، تات باسپايدى. سونىمەن قاتار مۇنداي اۆتوبۋستاردىڭ استى جول جيەكتەرىنە قانشا سوعىلسا دا، مايىرىلمايدى. ەڭ باستىسى، بۇل اۆتوبۋستار بۇرىنعى «تەمىر اعايىندارىنان» بەس تونناعا جەڭىل، سوندىقتان جانار-جاعار مايدى دا از جەيدى. ياعني ەكونوميكالىق تيىمدىلىگى جوعارى ءارى پايدالانۋ مەرزىمى دە ۇزاق. كۇنى بۇگىن بۇل اۆتوبۋستىڭ قاڭقالارىن رەسەيلىك «روسنانو» كومپانياسى جاساۋعا كىرىستى. سودان كەيىن ولار ۆەنگرياعا جىبەرىپ، سوندا تۇپكىلىكتى قۇراستىرىلادى. بۇل جۇمىسقا رەسەيدىڭ ماسكەۋ، نابەرەجنىە چەلنى قالالارىنداعى زاۋىتتار قۇلشىنىپ وتىر. مۇنداي اۆتوبۋستاردىڭ تيىمدىلىگىنە كوز جەتكىزۋ ءۇشىن سول جاڭادان قۇراستىرىلعانداردىڭ ءبىرىن ورالعا الدىرىپ، وسىندا پايدالانىپ كورۋگە كەلىسىلدى. سوندا سىناقتان ءساتتى وتسە، جاڭا تەحنولوگيا نەگىزىندە بۇل اۆتوبۋستى ورالدا دا قۇراستىرۋعا تولىق مۇمكىندىك بار.
«ورال اگرورەم ماش» ا ق وسىعان دەيىن يندۋستريالاندىرۋ كارتاسىنا ەنگىزىلگەن قوس بىردەي تىڭ جوبانى جۇزەگە اسىرعان بولاتىن. ونىڭ العاشقىسى جىلىنا 8500 توننا مەتالل كونسترۋكتسيالارىن شىعاراتىن ىستىقتاي مىرىشتاۋ ءوندىرىسى ەدى. بۇعان زاۋىت 71,3 ميلليون تەڭگە ءوز قارجىسىن جۇمساۋمەن بىرگە «بيزنەستىڭ جول كارتاسى - 2020» باعدارلاماسى اياسىندا 168 ميلليون تەڭگە كولەمىندە قولداۋ كومەك الدى. جوبا اياسىندا يتالياندىق «BISOL SpA» فيرماسىنىڭ جابدىقتارى ورناتىلىپ، جاڭا جۇمىس ورىندارى اشىلدى. وتكەن جىلى مۇندا 217,8 ميلليون تەڭگەگە 692 توننا ءونىم ءوندىرىلدى.
ەكىنشى جوبا (قۋاتى - جىلىنا 500 اۆتوكولىك، قۇنى - 500 ميلليون تەڭگە) «م ا ز» اۆتوموبيلدەرى نەگىزىندە ارنايى تەحنيكا شىعارۋ ءىسى دە ساتىمەن جۇزەگە استى. مۇندا دا 50 جاڭا جۇمىس ورنى اشىلدى. 2014-جىلى 2168,6 ميلليون تەڭگەگە 110 ارنايى تەحنيكا جونەلتىلدى.
«ورال اگرورەم ماشتىڭ» ءتۇرلى ۇلگىدەگى ءورت ءسوندىرۋ جانە كوممۋنالدىق تەحنيكالار شىعاراتىن قازاقستانداعى بىردەن-ءبىر كاسىپورىن ەكەندىگىن ايتا كەتەيىك.
«جاڭا جوبا بويىنشا جاڭعىرتىلعان سەحىمىزدى ىسكە قوسقان كەزدە ەلباسىمىز كەلىپ كورىپ، وعان جوعارى باعا بەردى. كادرلاردىڭ جەرگىلىكتى ەكەندىگىنە نازار اۋداردى. شىندىعىندا بىزدە وسى ورالدا وقىپ، ءبىلىم العان جاستار بارشىلىق. جۇمىس كەڭەس داۋىرىندەگىدەي، قولمەن ىستەلمەيدى، جاڭا تەحنولوگيا بولعاندىقتان، ولار ەلەكترونيكانى جاقسى بىلەدى. ماسەلەن، تەمىر كەسكەندە، بۇرىنعىداي بىرنەشە ادام جۇرمەيدى، كومپيۋتەرمەن جاسالاتىندىقتان، ءبىر-اق كىسى اتقارا بەرەدى. جالپى، زاۋىتتا 250 ادام تۇراقتى ەڭبەك ەتەدى. مەملەكەت باسشىسى وتاندىق ءوندىرىستى دامىتۋعا ايرىقشا قولداۋ ءبىلدىرىپ وتىرعاندىقتان، ءبىز دە سوعان ساي جۇمىس اتقارا بىلۋگە ءتيىستىمىز. تەندەرلەرگە قاتىسىپ جاتىرمىز، مەملەكەتتىك تاپسىرىستان دا قۇر قالىپ جاتقان جوقپىز. سوندىقتان جۇمىسسىز قالمايتىنىمىزعا سەنىمدىمىز»، دەدى ع. بيسەنوۆ.