كانديدات قازىرگى ۋاقىتتا ليگۆيستيكالىق كوميسسيا ۇسىنعان تاقىرىپتاردىڭ ىشىنەن «الەمدىك داعدارىس جانە قازاقستان ەكونوميكاسى» تاقىرىبىنا كولەمى 2 بەتتەن اسپايتىن جازباشا جۇمىسىن جازۋ ۇستىندە.
ق ر پرەزيدەنتتىگىنە كانديداتتاردى مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكالىق كوميسسيانىڭ ءتوراعاسى مىرزاتاي جولداسبەكوۆتىڭ تانىستىرۋىنشا، كانديدات 1959 - جىلدىڭ 31 - قاڭتارىندا جامبىل وبلىسىنىڭ جامبىل اۋدانىنا قاراستى قىزىلجۇلدىز اۋىلىندا دۇنيەگە كەلگەن. قازاقستان ازاماتى. ۇلتى - قازاق. ءبىلىمى جوعارى.
«اسقار جوراباي ۇلى، ءسىز سىناقتىڭ ءۇش دەڭگەيىنەن وتەسىز. ءبىرىنشى، جازبا جۇمىسىن جازاسىز. ءبىز ۇسىنعان تاقىرىپتىڭ ىشىنەن بىرەۋىن تاڭدايسىز دا ءبىر ساعات شىعارما، ەسسە جازاسىز. ءبىر ساعات جەتپەي جاتسا، تاعى جارتى ساعات ۋاقىت قوسا الامىز. وسى ءبىر جارىم ساعات ىشىندە ەكى پاراق جازبا جۇمىسىن وتكىزۋىڭىز كەرەك. ەكىنشى كەزەڭدە الدىن الا بەكىتكەن قازاق ادەبيەتىندەگى بەتكە ۇستار اۆتورلاردىڭ شىعارمالارىنان تاڭداۋ جاسايسىز. كوميسسيا مۇشەسى سول ءسىز تاڭداعان كىتاپتان ءۇش باسپا تاباق تاڭدايدى.
ءۇش باسپا تاباقتىڭ دەڭگەيىندە تاڭدالعان شىعارمانى وقىپ بەرەسىز. بارىنشا كوركەم، ىرعاقتى وقىعانىڭىز دۇرىس بولادى. ءۇشىنشى سىناق - ەركىن تاقىرىپ. ەركىن تاقىرىپتىڭ بىرەۋىن تاڭداعاننان كەيىن تاعى ءبىر ساعات ۋاقىت بەرىلەدى. ءبىر ساعات دايىندالعاننان كەيىن كوميسسيانىڭ الدىندا ون بەس مينۋت سول توڭىرەگىندە ەركىن سويلەپ بەرەسىز. وسى سىناقتار بىتكەننەن كەيىن كوميسسيا جەكە بولمەگە تالقىلاۋعا كەتىپ، سىزگە باعا بەرەمىز»، - دەدى م. جولداسبەكوۆ.
اۆتور: مارلان جيەمباي