قاڭىراپ بوس قالعان قالالاردىڭ سانى ارتتى
ساراپشىلار ءدال وسىلاي جالعاسا بەرسە، بىرنەشە جىلدا قاڭىراپ قالعان قالالار سانى كۇرت ارتادى دەپ دابىل قاعۋدا.
شۆەدت قالاسى كەزىندە تەمەكى ونىمدەرى مەن قاعاز شىعاراتىن كاسىپورىندارىمەن تانىمال ەدى. ال بۇگىن ول فابريكالار قيراپ تۇر. قالانىڭ قاڭىراۋىنا دا وسى سەبەپ بولدى. جۇمىسسىز قالعان تۇرعىندار جاپپاي كوشە باستادى. 10 جىلدىڭ ىشىندە شۆەدتەگى 5 اۋداننىڭ ءبىرى ءسۇرىلدى. ويتكەنى وندا ەشكىم تۇرمايدى. 1980 -جىلى تۇرعان 52 مىڭ ادامنىڭ تەك 30 مىڭى قالعان. زيگفريد ميۋللەر، شۆەدت قالاسىنىڭ تۇرعىنى:
- مەن بۇل قالادا 1977 - جىلدان بەرى تۇرامىن. ءوزىم مۇناي ءوندىرۋ زاۋىتىندا جۇمىس ىستەدىم. جاقسى ءومىر سۇرگەن ەدىك. قالامىز وسىنداي كۇيگە تۇسەتىنىن بىلمەپپىز. قاڭىراپ قالعان قالاعا قاراۋعا جۇرەگىمىز شىدامايدى. جاستار دا ازايعان. مەنىڭ ەكى ۇلىم دا بەرلينگە جۇمىس ىستەۋگە كەتكەن. ال مۇندا ءوزىم سياقتى زەينەتكەرلەر عانا قالعان.
ۆايسۆاسسەردە دە زەينەتكەرلەردى كورۋگە بولادى. سوڭعى 20 جىلدا بۇل جاستار ەمەس قاريالار قالاسىنا اينالعان. جۇمىسسىزدار سانىمەن دە كوش باستاپ تۇر. مۇنداعىلاردىڭ 44 پايىزى جۇمىس ىستەمەي، تەك الەۋمەتتىك تولەمدەرمەن كۇن كورۋدە. حالىقتىڭ ۇشتەن بىرىندە عانا تۇراقتى تابىس بار. حويەرسۆەردتە دە جاعداي ءماز ەمەس. 1980 -جىلدىڭ باسىندا مۇندا 70 مىڭ ادام تۇرعان. ال بۇگىندە ونىڭ جارتىسى عانا قالدى. گۋبەندە دە ءدال وسىنداي جاعداي. حالىق 36 مىڭنان ەكى ەسە ازايعان.
پەتەر كاللە، گۋبەن قالاسىنىڭ تۇرعىنى:
- ءبارى كەتىپ جاتىر. ءبىرى جۇمىس ىزدەپ كەتسە، ءبىرى مۇلدەم كوشىپ كەتتى. مەن بۇرىن حيميالىق كومبيناتتا قىزمەت ەتتىم. ونداعى ءونىم سۇرانىسقا يە ەدى. ءبىراق 8 مىڭ جۇمىسشىسى بار زاۋىتتى جاۋىپ تاستادى. بۇل قالادا تاعى ون جىلدان كەيىن نە بولارىن بىلمەيمىن.
گەرمانيا «قاڭىراعان قالالاردىڭ» تاعدىرىنا الاڭداۋشىلىق ءبىلدىرىپ وتىر. ولاردىڭ مۇلدەم توقتاپ قالماۋى ءۇشىن ەل ۇكىمەتى قايتا قالپىنا كەلتىرۋ جۇمىستارىن باستادى. ءبىرىنشى كەزەكتە جولدى جوندەپ، كوگالداندىرۋعا كىرىسپەك. ول ءۇشىن 2019 - جىلعا دەيىن ەل بيۋدجەتىنەن 76 ميلليون ەۆرو ءبولىندى.
www.24.kz