بۇل پىكىردى قازاقپارات تىلشىسىنە قازاق مەملەكەتتىك قىزدار پەداگوگيكالىق ۋنيۆەرسيتەتى كوپ ءتىلدى ءبىلىم بەرۋدى دامىتۋ ورتالىعىنىڭ ديرەكتورى ساۋلە اسانبايەۆا ءبىلدىردى.
«قازاقستان حالقى اسسامبلەياسى ءتۇرلى ۇلت پەن ۇلىستىڭ اتىنان ۇندەۋ جاريالاۋ ارقىلى ءبىزدىڭ قوعامىمىزعا سەرپىلىس بەردى. كەزەكتەن تىس پرەزيدەنت سايلاۋىن وتكىزۋ تۋرالى ۇسىنىس ءا دەگەننەن- اق اۋىل- ايماققا تارالىپ، كوپتىڭ تالقىلاۋىنا كەڭىنەن سالىندى.
ءتۇرلى سالانىڭ قىزمەتكەرلەرى ءوز وي- پىكىرلەرىن ورتاعا سالىپ، سايلاۋ وتكىزۋگە قىزۋ قولداۋ ءبىلدىردى. مىنە، وسى حالىقتىڭ ءۇنى ۇلت كوشباسشىسىنا جەتتى. مەملەكەت باسشىسى قازاقستان حالقىنا جاريالاعان ۇندەۋىمەن بيىلعى جىلى سايلاۋ وتكىزىلەتىندىگىن حابارلاپ، قازاقستاندىقتاردى ەل تاريحىنداعى ەلەۋلى وقيعادان قالىس قالماۋعا شاقىردى»، - دەدى ول.
س. اسانبايەۆانىڭ اتاپ وتۋىنشە، پرەزيدەنت نۇرسۇلتان نازاربايەۆتىڭ «نۇرلى جول - بولاشاققا باستار جول» جولداۋىنداعى ايقىن باسىمدىقتار - قوعام مۇشەسىنىڭ، ياكي ادامنىڭ قادىر- قاسيەتىن، يگىلىگى مەن قۇقىعىن، تالاپ- تىلەگىن، ارمان- مۇددەسىن مەملەكەتتىك مۇرات توڭىرەگىنە توپتاستىرۋ ارقىلى جاڭعىرۋ مەن جاڭارۋعا باستايتىن ماقساتتار تىزبەگى.
«ۇلت كوشباسشىسى حالىققا جاريالاعان كەشەگى ۇندەۋىندە «الەمدىك ەكونوميكالىق داعدارىس بەلەڭ الا تۇسكەن كەزەڭدە حالىققا ەرتەڭگى ەرتەڭگى كۇنىنە دەگەن سەنىمدىلىك كەرەك. بۇل، ەڭ الدىمەن، جۇمىس ورىندارىمەن قامتاماسىز ەتۋ، الەۋمەتتىك تولەمدەردىڭ، جالاقىنىڭ، ستيپەنديانىڭ تۇراقتىلىعى» دەدى. وسى سەنىمدىلىك ءبىزدىڭ ءبىرتۇتاس قوعامىمىزدا بىرلىگىمىز بەن ىنتىماعىمىزدىڭ ناتيجەسى ارقىلى جۇزەگە اساتىن بولادى»، - دەدى ول.
ورتالىق باسشىسىنىڭ ايتۋىنشا، ءاربىر ادام ءوزى تاڭداعان ماماندىق يەسى رەتىندە ادال قىزمەت اتقارىپ، قوعامنىڭ گۇلدەنۋىنە، دامۋىنا اتسالىسۋ كەرەك. ال وسى رەتتە كەزەكتەن تىس پرەزيدەنتتىك سايلاۋدىڭ وتكىزىلۋى - ءبىزدىڭ تاڭداۋ جاساۋىمىزعا، تۇراقتىلىق پەن بەيبىتشىلىككە، دامۋ مەن كەمەلدەنۋگە داۋىس بەرۋىمىزگە، ءوز تاڭداۋىمىزعا سەنىمدىلىك بىلدىرۋىمىزگە مۇمكىندىك بەرەدى.
«ءبىز، مىنە، تاۋەلسىزدىگىمىزدىڭ 23 جىلدان استام ۋاقىتىندا ەلباسىنىڭ باعدارلى جوسپارىمەن، سارابدال ساياساتىمەن، ماقساتى ايقىن نىق قادامدارمەن دامىپ، بىرلىك پەن ىنتىماقتىڭ ارقاسىندا ەكونوميكانىڭ الەمدىك جاھاندانۋى، وتاندىق ءبىلىمنىڭ الەمدىك ءبىلىم ۇدەرىسىنە كىرىگۋى، كادرلاردىڭ باسەكەگە قابىلەتتى بولۋى نەگىزىندە وركەندەپ كەلەمىز.
ولاردىڭ اكادەميالىق ۇتقىرلىعى كوبىنە كوپ تىلدە سويلەۋ مۇمكىندىگىمەن قامتاماسىز ەتىلەتىنى بار. بۇل ماسەلە ەلدىڭ يندۋستريالدى- يننوۆاتسيالىق دامۋ جاعدايىندا ايرىقشا وزەكتىلىككە يە ەكەنى ءسوزسىز. وسى تۇرعىدان العاندا كەزەكتەن تىس پرەزيدەنتتىك سايلاۋ - ەلدەگى ەكونوميكالىق قيىندىقتاردى شەشۋدە تۇراقتىلىق پەن داعدارىسقا قارسى شارالاردى جۇزەگە اسىرۋدى قامتاماسىز ەتەتىن باتىل شەشىم ەكەنىنە سەنىم مول. ياعني، الداعى پرەزيدەنت سايلاۋى - قازاقستاننىڭ مەملەكەتتىگىن ودان ءارى نىعايتا ءتۇسۋ جولىندا حالىق مۇددەسىنە ساي كەلەتىن اسا ماڭىزدى ستراتەگيالىق قادام ەكەنى انىق»، - دەدى س. اسانبايەۆا.
اۆتور: مارلان جيەمباي