«مەن ءومىر بويى پرەزيدەنتكە حات جازۋدى ارماندادىم. وعان ءومىر ءسۇرىپ وتىرعان بەيبىت زامانىمىز ءۇشىن العىس ايتقىم كەلدى. مەن كوپ جىل بويى ويلاپ، جوسپارلاپ ءجۇردىم، مىنە، شەشىم جاساپ، حات جازدىم. ءوزىم جايلى، كەرەمەت نەمەرەلەرىم جايلى، قاراعاندىداعى جاقسى ءارى جايلى ءومىر جايلى ايتىپ بەردىم. مەملەكەت باسشىسىنان ەشتەڭە سۇرامادىم. مەندە ءبارى بار - جاقسى زەينەتاقى، پاتەر، ۇلكەن وتباسى، 4 بالا، 7 نەمەرە، 7 شوبەرە»، - دەدى نينا الەكسەيەۆنا.
79 جاستاعى زەينەتكەر پرەزيدەنت اكىمشىلىگىنىڭ مەكەنجايىن ينتەرنەتتەن تاپقان. «حات سالىنعان كونۆەرتتى مەن «قازپوشتا» ا ق ارقىلى قاراپايىم جولمەن جىبەردىم، تاپسىرىسپەن ەمەس، حابارلاندىرۋسىز. پرەزيدەنت مەنىڭ حاتىمدى وقىپ بەرگەندە تاڭعالدىم. نۇرسۇلتان ءابىش ۇلىنىڭ مەنىڭ حاتىمدى الاتىنىنا، تانىسىپ شىعاتىنىنا سەنىمدى بولدىم. ءبىراق ەفيردە وقيدى دەپ ويلامادىم. مەن تەلەديدار كورىپ وتىرىپ جىلاپ جىبەردىم»، - دەدى قاراعاندىلىق اجە.
نينا الەكسەيەۆنا بۇرىن قۇرىلىسشى بولعان. ونىمەن 50 جىلدان استام ۋاقىت بويى بىرگە عۇمىر كەشكەن مارقۇم كۇيەۋى دە قۇرىلىسشى بولىپتى. 1963 - جىلى جاس جۇبايلار بەلارۋستەن كوشىپ كەلگەن. كۇيەۋى 2011 - جىلى قايتىس بولدى. نينا ميسوچەنكو ۇلى وتان سوعىسى كەزىندەگى اۋىر جىلداردى ەسىنە الادى، سوعىس باستالعاندا ول 5 جاستا بولعان. قازىر ول روماندار مەن حيكايالار جازىپ ءجۇر. كەلگەن جاسىنا قاراماستان، ول كومپيۋتەردى جەتىك مەڭگەرگەن.
ەسكە سالا كەتەيىك، 25 - اقپاندا نۇرسۇلتان نازاربايەۆ قازاقستان حالقىنا ۇندەۋ جاسادى. ەفيردە ول نينا ميسوچەنكو جولداعان حاتتى وقىپ بەردى. ءوز حاتىندا ايەل ەلدىڭ قاۋىپسىزدىگى مەن تۇراقتىلىعىنداعى پرەزيدەنتتىڭ ءرولىن اتاپ ءوتتى.
«كۇن سايىن بالالارىمنىڭ اماندىعى ءۇشىن، جەرىمىزدەگى بەيبىتشىلىك پەن تىنىشتىق ءۇشىن ءمىناجات ەتەمىن. كۇن سايىن قۇدايدىڭ الدىندا ءبىزدىڭ ۇيلەرىمىزگە ەشقاشان ەشقانداي الاۋىزدىق پەن ەشقانداي سوعىس قاتەر توندىرمەسىن، ءبىز قاشاندا بەيبىت جانە باقىتتى ءومىر سۇرەيىك دەپ جالبارىنامىن. قازاقستاندا بارلىق ادامدار تاتۋلىق پەن ءبىر-بىرىنە سەنىممەن ءومىر ءسۇرىپ جاتسا، بۇل ءسىزدىڭ ەرەن ەڭبەگىڭىزدىڭ ارقاسى. قازاقستاندىقتار بىرگە ەڭبەك ەتىپ، ءبىر- بىرىنە قولۇشتارىن بەرەدى، بالالارى مەن نەمەرەلەرىن الاڭسىز وقىتىپ، ءوسىرىپ جاتىر. ءارقاشان جانە ماڭگىلىك وسىلاي بولا بەرسىن!» - دەپ حاتتىڭ ءۇزىندىسىن وقىپ بەرگەن پرەزيدەنت نينا الەكسەيەۆناعا العىس ايتىپ، بارلىق جەتىستىكتەردىڭ جەكە ءوزىنىڭ ەمەس، بۇكىل حالىقتىڭ جەتىستىگى ەكەنىن ايتىپ ءوتتى.
ءوزىنىڭ جولداۋىندا مەملەكەت باسشىسى ق ر پرەزيدەنتىنىڭ كەزەكتەن تىس سايلاۋىن 2015 -جىلدىڭ 26 - ساۋىرىنە بەلگىلەۋ تۋرالى شەشىم قابىلداعانى تۋرالى حابارلادى.