داماسكتە ءال- فارابي اتىنداعى قازاق مادەني ورتالىعى بار - فوتو

ءابۋ- دابي - بەيرۋت. قازاقپارات - سيريادا، ەلدە بولىپ جاتقان سوعىسقا قاراماستان، ءال- فارابي اتىنداعى قازاق مادەني ورتالىعى جانە دالا دانىشپانىنىڭ قۇلپىتاسى ساقتالعان.

 قازاقپارات پەن سيرياداعى ق ر كونسۋلدىعى سيريا جەرىندەگى قازاقستاندىق نىسانداردىڭ جاڭا سۋرەتتەرىنە قول جەتكىزدى.

 ەسكە سالا كەتەيىك، 2008 - جىلى ق ر ۇكىمەتى ءال- فارابي اتىنداعى مادەني ورتالىق پەن ونىڭ قابىرىنىڭ قۇرىلىسىنا، سونىمەن بىرگە ءاز- زاحير بەيبارىس سۇلتاننىڭ مولاسىن قالىپقا كەلتىرۋگە رەسپۋبليكالىق بيۋدجەتتەن 83,8 ميلليون تەڭگە بولگەن.

 2011 - جىلى قالىپقا كەلتىرۋ جۇمىستارى اياقتالدى. الايدا سيرياداعى ازاماتتىق سوعىس بۇل نىسانداردىڭ اشىلۋى مەن جۇمىس جاساۋىنا كەدەرگى كەلتىردى. اتاپ وتكەن ءجون، مۇنداي نىساندار الەمنىڭ وزگە جەرىندە جوق.

مىڭداعان جىلدار بويى داماسك (داماشىق، شام) يسلام الەمىنىڭ ەكونوميكالىق، مادەني جانە عىلىمي ورتالىعى بولىپ ەسەپتەلگەن. ءومىرىنىڭ سوڭعى جىلدارىن ءاز- زاحير تىڭ وسىندا وتكىزۋى تەگىن ەمەس.

 بەيبارىس سۇلتان بۇل ەلدە ءبىرىنشى بولىپ تۇراقتى اسكەردى، اسكەري فلوتتى، كەدەندى، اسا جوعارى دەڭگەيدە جۇمىس ىستەگەن بارلاۋ قىزمەتىن قۇرىپ، يسلام عىلىمى، مادەنيەتى، ادەبيەتى جانە ساۋلەتىنىڭ وركەندەۋىن قامتاماسىز ەتتى. ول مۇسىلمان الەمىن موڭعول شاپقىنشىلىعىنان قۇتقارىپ، وزگە جاۋلاۋشىلاردىڭ دا بەتىن قايتاردى.

 ۇلى قولباسشىنىڭ قۇرمەتىنە داماسكىدە بەيبارىس سۇلتاننىڭ مەكتەبىن، كەسەنەسىن جانە كىتاپحاناسىن بىرىكتىرەتىن كەشەن قۇرىلدى. قازىر مۇندا سۇلتان بەيبارىس زامانىنداعى ۇلتتىق كىتاپحانا ورنالاسقان. وندا بۇرىنعى زامانعى ادامدار مەن قازاق حالقىنىڭ تاريحىنا ارنالعان شامامەن 200 مىڭعا جۋىق قولجازبا مەن كىتاپ بار.