حالىقتىڭ قالاۋى - تىنىشتىق، بەيبىتشىلىك، تاتۋلىق - ءماجىلىس دەپۋتاتى ا. تاسبولاتوۆ

استانا. قازاقپارات - ەلىمىزدىڭ باستى باعدارى بولعان «ماڭگىلىك ەل» يدەياسى مەن «نۇرلى جول» باعدارلاماسىندا ايتىلعانداي، حالىقتىڭ قالاۋى - تىنىشتىق، بەيبىتشىلىك، تاتۋلىق. بۇل تۋرالى «ەگەمەن قازاقستان» گازەتىندە پارلامەنت ءماجىلىسىنىڭ دەپۋتاتى، گەنەرال- لەيتەنانت، تاريح عىلىمدارىنىڭ دوكتورى، پروفەسسور، «نۇر وتان» پارتياسىنىڭ مۇشەسى اباي تاسبولاتوۆ ءوز پىكىرىن ءبىلدىردى.

«بيىلعى جىلدىڭ 14- اقپان كۇنى قازاقستان حالقى اسسامبلەياسىنىڭ كەڭەسى قازاقستاندا كەزەكتەن تىس پرەزيدەنتتىك سايلاۋ وتكىزۋ تۋرالى باستاما كوتەرگەنى بارشامىزعا ايان. جالپى، قازاقستان حالقى اسسامبلەياسىنىڭ بۇل ۇسىنىسىن ءوزىم جۇرگەن جەرلەردە قالىڭ بۇقارانىڭ، ياعني بارشا حالىقتىڭ، زيالى قاۋىم وكىلدەرىنىڭ ءبىراۋىزدان قولداپ، وڭ پىكىر ءبىلدىرىپ جاتقانىنىڭ كۋاسى بولدىم»، - دەدى ول.

«بۇگىندە الەمدەگى قارجىلىق قيىنشىلىقتار مەن گەوساياسي جاعداي، تۇراقسىزدىق ورناعان ۋكرايناداعى اسكەري قاقتىعىستار تۇسىندا قازاقستان ءوزىنىڭ قارقىندى دامۋ جولىن تاڭداپ الدى. ەلىمىزدىڭ باستى باعدارى بولعان «ماڭگىلىك ەل» يدەياسى مەن «نۇرلى جول» باعدارلاماسىندا ايتىلعانداي، حالىقتىڭ قالاۋى - تىنىشتىق، بەيبىتشىلىك، تاتۋلىق. ال بۇعان اسكەري ادام رەتىندە ايتارىم، ەلىمىزدەگى تاتۋلىق پەن بەيبىتشىلىكتىڭ تۇراقتى كەپىلى بولا بىلگەن ەلباسى - تاۋەلسىز قازاقستان قارۋلى كۇشتەرىنىڭ نەگىزىن سالۋشى»، - دەپ اتاپ ءوتتى اباي تاسبولاتوۆ.

ونىڭ ايتۋىنشا، پرەزيدەنت ن. ءا. نازاربايەۆ قارۋلى كۇشتەردىڭ مەملەكەت ومىرىندەگى ءرولى مەن ماڭىزىن تەرەڭ ءتۇسىنىپ، تاۋەلسىز ەلدىڭ قورعانىس سالاسىنىڭ قالىپتاسۋى مەن دامۋىنا تىكەلەي باسشىلىق ەتىپ كەلەدى. تاۋەلسىزدىك ورناعاننان بەرى قاراي تۇڭعىش پرەزيدەنتىمىز ەلدىڭ قارۋلى كۇشتەرىنىڭ قالىپتاسۋىنا بەلسەنە ارالاسىپ، ونى زامانا تالاپتارىنا ساي جوعارى ساپادا جەتىلدىرۋ ماسەلەسىن باستى نازاردا ۇستاۋدا. سونىڭ ارقاسىندا ەلىمىزدە تىنىشتىق ورناعان. «سوندىقتان ءبىز دە «نۇر وتان» پارتياسىنىڭ مۇشەسى رەتىندە قازاقستان حالقى اسسامبلەياسىنىڭ بۇل باستاماسىن تولىقتاي قۇپتايتىنىمدى جەتكىزەمىن»، - دەپ ءتۇيدى ءسوزىن ءماجىلىس دەپۋتاتى.