قازاق حاندارى تۋ تىككەن تۇركىستان

استانا. قازاقپارات - جۋىردا «ەسىك» مەملەكەتتىك تاريحي-مادەني قورىق-مۇراجايىندا «ازىرەت سۇلتان» مەملەكەتتىك تاريحي-مادەني قورىق-مۇراجايىنىڭ ۇيىمداستىرۋىمەن «قازاق حاندارى تۋ تىككەن تۇركىستان» اتتى كورمەنىڭ اشىلۋ ءراسىمى وتەدى.

بۇل كورمە - قازاق حاندىعى قۇرىلۋىنىڭ 550 جىلدىعىنا ارنالماق. حالقىمىزدىڭ ەجەلدەن ىرگەلى ەل بولعاندىعى، ۇشقان قۇستىڭ قاناتى تالاتىن، جىلقىنىڭ تۇياعى توزاتىن ۇلان عايىر دالاسى قازاقتىڭ جيىرما ءبىر حانىنا استانا بولعان تۇركىستانداي شاھارى بولعاندىعىن ءتول تاريحىمىزدا الار ورنى مەن ءرولىن ايقىنداپ كورسەتۋ كورمەنىڭ باستى ماقساتى. سونداي-اق، بۇل كورمە ەكسپوزيتسياسىندا ەل باسقارعان حانداردىڭ اتقارعان ەرەن ەڭبەكتەرىن، ەلىنىڭ ەركىندىگى، جەرىنىڭ ازاتتىعى جولىندا جاساعان كوزسىز ەرلىگىن كەلەشەك ۇرپاق بويىنا ءسىڭىرۋدى كوزدەيدى. تۇعىرلى تاۋەلسىزدىگىمىزدىڭ قاينار كوزى -  بابالار اماناتى ەكەندىگىن پاش ەتۋ.

كورمە ەكسپوزيتسياسىنا قورىق-مۇراجاي قورىنداعى 150 گە جۋىق قۇندى جادىگەرلەر قويىلماق.

كورمە «حاندارعا وردا بولعان كيەلى مەكەن»، «تۇركىستانعا تۋ تىككەن حاندار»، «تۇركىستان تاعىلىمى» جانە «الاشقا ايبىن بولعان حان ابىلاي» دەگەن تاقىرىپتا ءتورت بولىمنەن تۇرادى. كورمەنىڭ ءتورتىنشى ءبولىمى دەپ اتالادى. اتالمىش بولىمدە تۇركىستاندا بيلىك قۇرعان ابىلمامبەت حان باراق حاندار جايىندا بولماق.

وسى بولىمدەرگە قوسىمشا ابىلمامبەت، باراق حانداردىڭ رەسەي پاتشايىمى ەليزاۆەتا پەتروۆناعا 17- قازان، 1745-جىلى ىنتىماقتاستىق جونىندە جازعان حاتى قويىلادى. ХVІ-ХVІІІ عاسىرلاردا تۇركىستانداعى اقشا سارايىندا سوعىلعان مىس تيىنداردىڭ ەلۋگە جۋىق تۇرلەرى ەكسپوزيتسيادان كورنىس تابادى. سونداي-اق، ارنايى تەلەديداردان كورمە ەكسپوزيتسياسىنىڭ قاتارىندا كورسەتىلەر «تۇركىستانداعى حان كوتەرۋ» تاريحي-قويىلىمىنىڭ اسەرى دە مول بولماق.

كورمە الماتى وبلىسى، ەڭبەكشى قازاق اۋدانى، راحات ا/و، الماتى-كوكپەك-كوكتال، ەسىك كىرە بەرىسى- 6,6 شاقىرىمدا ورنالاسقان «ەسىك» مەملەكەتتىك تاريحي-مادەني قورىق-مۇراجايىندا 2015-جىلدىڭ 27- اقپاننان 27- ناۋرىزعا دەيىن جالعاسادى.

«الاش ايناسى»