ناۋبايحاناشى دەمالىسسىز جۇمىس جاساعانى ءۇشىن سوتقا تارتىلدى

استانا. قازاقپارات - فرانسياداعى «ۇزدىك نان-2014» تيتۋلىنىڭ جەڭىمپازى ستەفان كازناۆ تىنىمسىز جۇمىس جاساعانى ءۇشىن ايىپتى دەپ تانىلىپ وتىر. ونىڭ نان دۇكەنى اپتاسىنا 7 كۇن بويى جۇمىس جاسايدى، ال بۇعان فرانسيا زاڭىندا تىيىم سالىنعان.

«ەڭبەك ينسپەكتورى ەكى رەت كەلىپ مەنى تەرگەپ كەتتى، ءتىپتى پوليتسيا دا سۇراقتىڭ استىنا الدى. ەندى مەنى سوت كۇتىپ تۇر»، - دەدى ناۋبايحاناشى.

سوت كازناۆقا اپتاسىنا 6 كۇن جۇمىس ىستەۋ تۋرالى شەشىم شىعاردى، ەندى ونىڭ ناۋبايحاناسى دۇيسەنبى سايىن جابىق بولادى. ونىڭ ايتۋىنا قاراعاندا، ول 250 مىڭ ەۋرو شىعىنعا باتادى، سونداي-اق بىرنەشە قىزمەتكەرلەردى جۇمىستان شىعارۋعا ءماجبۇر بولىپ وتىر. «مەن قاتتى تاڭعالدىم، ءبىراق بۇل زاڭ، ودان اسا المايمىز»، - دەپ كۇيىندى ول.

ايتا كەتەيىك، فرانسيادا اپتاسىنا 7 كۇن جۇمىس ىستەۋگە تەك بەلگىلى ءبىر مەكەمەلەرگە (قوناق ءۇي، ءورت ءسوندىرۋ قىزمەتى، ب ا ق) عانا رۇقسات بەرۋ تۋرالى زاڭ عاسىردان استام ۋاقىت بۇرىن قابىلدانعان بولاتىن.