الەمدەگى ەڭ ۇزىن ادام قازاقستانعا سالەم جولدادى - فوتو
ول التى جىل بۇرىن 2 مەتر 47 س م بويىمەن گيننەستىڭ رەكوردتار كىتابىنا كىرگەن ەدى.
بىرنەشە جىلدان بەرى رەكورد يەسى اتاعىن بەرمەي كەلە جاتقان سۇلتاننىڭ قازىرگى بويى 2 مەتر 51 س م. «اتاقتىلاردىڭ» كىتابىنا ەنگەننەن بەرى ومىرگە دەگەن كوزقاراسى وزگەرىپ، وزىنە دەگەن بۇرىنعى وكپەسى تارقاعانىن ايتادى.
سۇلتان كوسەن 1982 - جىلى تۇركيانىڭ ماردين قالاسىنىڭ ورتا بويلى وتباسىندا دۇنيەگە كەلگەن. بەس اعايىندى. مەكتەپتى بويىنىڭ تىم ۇزىن ءارى قولايسىزدىعىنا بايلانىستى تولىق اياقتاي الماعان. اق حالاتتىلار كوسەننىڭ وسىنشاما الىپ دەنەلى اتانۋىنا «گيپوفيز ىسىكتەرى» سەپ بولعان دەيدى. دەگەنمەن، ەڭ ۇزىن جىگىت قازىر دەنساۋلىعى دۇرىستالىپ، گورموندار اۋىتقۋى بايقالمايتىنىن مالىمدەدى.
سۇلتانعا سوڭعى جىلدارى قىزىعۋشىلىق پەن سۇرانىستىڭ سانى ارتىپ، شار تاراپتان شاقىرتۋلار ءجيى تۇسە باستادى. ساعاتىن ەسەپتەپ، بارعان جەرىنەن اقى سۇرايدى. ويتكەنى حالىقارالىق جارمەڭكەلەر مەن مەرەكەلىك كەشتەردىڭ باس كەيىپكەرىنە اينالعان، دەپ جازادى «استانا» ارناسى.
«بالا كەزىمدە بويىمنىڭ ۇزىندىعىنان ءبىراز قيىندىق كورىپ، وزىمە كوپ رەنجيتىن ەدىم. سول ءۇشىن مەكتەپتى ورتا جولدان تاستادىم. 2012 - جىلعا دەيىن بويىم توقتاۋسىز ءوستى. سول ءۇشىن ۋاقىتىلى ەمدەلىپ، تەكسەرىلىپ ءجۇرمىن. 2009 - جىلى گيننەس كىتابىنا كىرىپ، جاڭا ءومىردى باستاعاندايمىن. ءوز ورنىمدى ەشكىمگە بەرمەي، ۇنەمى الدا بولعىم كەلەدى. سەبەبى وسى بويىممەن وتباسىمدى اسىراپ وتىرمىن»، - دەيدى سۇلتان كوسەن.
رەكوردتار كىتابىنىڭ ماماندارىن قىزىقتىرعان سۇلتان كوسەننىڭ تەك بويى عانا ەمەس. ماسەلەن، ونىڭ الاقانى 28 س م. ال اياق كيىمىنىڭ ولشەمى - 60. ياعني سانيتمەترگە سالعاندا - 36. ەگەر تىك تۇرىپ، ەكى قولىن جوعارى سوزسا، 4 مەترگە دەيىن جەتىپ قالادى. بىلتىر جازدا رەكوردتار كىتابىنىڭ ۇجىمى ونى انگليانىڭ باس قالاسىندا الەمدەگى ەڭ قىسقا بويلى ادام نەپالدىق چاندرا ءباحادۇر دانگيمەن كەزدەستىردى. ءتۇرلى شارالارعا شاقىرتۋلار ءۇستى- ۇستىنە ءتۇسىپ جاتىر.
«وسىنداي ۇزىن بويمەن جانە 160 كەلىدەن اسا سالماقتى ارقالاپ، ءجۇرىپ- تۇرۋ وڭاي ەمەس مەن ءۇشىن. سوندىقتان بالداقتىڭ كومەگىنە جۇگىنەمىن. سوڭعى جىلدارى شەتەلدەن شاقىرتۋ كوپ تۇسۋدە. ساياحات كەزىندە كولىك پەن ۇشاققا مىنەردە قينالامىن»، - دەيدى ول.
الىپ دەنەلى ازاماتقا جاقىندا عانا امەريكالىق رەجيسسەرلەر ۇسىنىس ايتىپ، گولليۆۋدقا شاقىرعان. وسىلايشا، الداعى كۇندەرى كينو الەمىندە باعىن سىناپ كورمەك. ءبىر جىل بۇرىن شاڭىراق كوتەرگەن سۇلتان كوسەننىڭ كوپ بالانىڭ اكەسى اتانسام دەگەن ارمانى بار. ايتا كەتەيىك، بۇعان دەيىن الەمنىڭ ەڭ ۇزىنى باو سيشۋن ەسىمدى قىتاي ازاماتى بولعان. ونىڭ بويى - 2.36 س م.
«مەن، سۇلتان كوسەن، الەمنىڭ ەڭ ۇزىن ادامى رەتىندە «استانا» ارناسى ارقىلى قازاقستانعا سالەم جولدايمىن»، - دەدى الەمدەگى ەڭ ۇزىن ادام.
سۋرەتتەر «استانا» ارناسىنىڭ ءتىلشىسى سامات سۇلەيدىڭ فەيسبۋكتەگى جەكە پاراقشاسىنان الىندى