برازيليا ۇلتتىق مەرەكەلەرى كارناۆالدان نەگە باس تارتادى؟
بۇعان ەلدە سوڭعى 85 جىلدا بولماعان ەڭ قاتتى قۇرعاقشىلىق نەگىزگى سەبەپ بولىپ وتىر، دەپ جازادى «ەگەمەن قازاقستان» گازەتى.
ەلدىڭ كوپتەگەن وڭىرلەرىندە سۋ تاپشىلىعى ۇلكەن پروبلەماعا اينالىپ بارادى.
قۋاڭشىلىقتان، اسىرەسە، اۋىل شارۋاشىلىعى زيان شەگۋدە. وعان قوسا، ەلەكتر قۋاتىنىڭ 80 پايىزى گيدروەلەكترستانسالاردان وندىرىلەتىندىكتەن، برازيليادا ەنەرگەتيكا تاپشىلىعى دا سەزىلە باستادى. سوعان بايلانىستى ەلدىڭ بىرنەشە شتاتىندا اۋىزسۋدى ۇنەمدەۋ شارالارى جالعاسۋدا. ەل ەكونوميكاسىنا مۇناي نارىعىنداعى داعدارىس تا سوققى بەرۋدە.
برازيليا تۇرعىنى پەپە كاراكوسسا: «مەنىڭشە، كارناۆالدى بولدىرماۋ ەشتەڭەنى شەشپەيدى. از عانا ۋاقىتتا اۋىزسۋ تاۋسىلىپ قالمايدى. كارناۆال - برازيليانىڭ ۇلتتىق قۇندىلىعى. جىلىنا ءبىر رەت وتەتىن اسا ماڭىزدى شاراعا تىيىم سالۋ دۇرىس ەمەس»، دەيدى.
ال مادەنيەت سالاسىنىڭ وكىلى مارسەللو دانيەل: «ءبىز كوشە كارناۆالىن وتكىزبەۋدى ءجون كورىپ وتىرمىز. ويتكەنى، شارا بارىسىندا قالالارعا تۋريستەر وتە كوپ كەلەدى. ولاردىڭ بارلىعىنا جاعداي جاساۋ قيىن. اسىرەسە، سۋ تاپشىلىعى قول بايلاپ تۇر»، - دەيدى.
وسىلايشا، برازيليا قالالارىنىڭ جارتىسىندا سۋدىڭ جەتىمسىزدىگى حالىقتى تىعىرىققا تىرەۋدە. ءتىپتى، جۋىناتىن جانە ىشەتىن سۋدىڭ ءوزى ۇلكەن ماسەلەگە اينالعان. بۇعان قوسىمشا، مۇناي باعاسىنىڭ قۇلدىراۋى دا مەملەكەتتىڭ احۋالىن ناشارلاتىپ جىبەرگەن.