ەكس- شەنەۋنىكتى قاماۋعا الۋ بۇلتارتپاۋ شاراسى مۇلكىن تاركىلەۋمەن قاتار، ەشقايدا شىقپاۋ قولحاتىنا اۋىستىرىلىپ، 1 ميلليارد 101 ميلليون تەڭگە ايىپپۇل تولەۋگە مىندەتتەلدى.
بۇل تۋرالى استانا قالاسىنىڭ قىلمىستىق ىستەرى جونىندەگى مامانداندىرىلعان اۋدان ارالىق سوتى ءمالىم ەتتى.
ايتا كەتەيىك، بۇعان دەيىن مەملەكەتتىك ايىپتاۋشى تاراپ ق ر تابيعي مونوپوليالاردى رەتتەۋ اگەنتتىگىنىڭ بۇرىنعى ءتوراعاسى مۇرات وسپانوۆتى 11 جىلعا باس بوستاندىعىنان ايىرۋ جازاسىن سۇراعان بولاتىن.
مۇرات وسپانوۆقا قىلمىستىق كودەكستىڭ 311- بابى بويىنشا اسا ءىرى كولەمدە پارا الدى دەگەن كىنا تاعىلعان ەدى.
وسپانوۆ 2014 - جىلعى 1 - شىلدەدە قارجى پوليسياسى اگەنتتىگىندە جاۋاپ بەرۋدەن كەيىن ۇستالدى.
سوتتىڭ جىبەرگەن حابارلاماسى بويىنشا، ۇكىم شىعارۋ كەزىندە م. وسپانوۆتىڭ بۇرىن ەشقانداي قىلمىس جاساماعانى، مەملەكەتتىك ناگرادالارمەن ماراپاتتالعان قىزمەتتىك ءوتىلى ەسكەرىلدى.
ەستەرىڭىزگە سالايىق، م. وسپانوۆ 300 مىڭ دوللار كولەمىندە پارا الدى دەگەن كۇدىكپەن بىلتىر شىلدە ايىندا ۇستالعان بولاتىن، كەيىنىرەك سوت ونى قاماۋعا الۋدى سانكسيالادى. مۇرات وسپانوۆ ق ر تابيعي مونوپوليالاردى رەتتەۋ اگەنتتىگىنىڭ ءتوراعاسى قىزمەتىنە 2012 - جىلدىڭ قاڭتار ايىندا تاعايىندالعان.
اۆتور: ءابۋ- اسقار مەكەش ۇلى