اتلانتاداعى (ا ق ش) دجوردجي تەحنولوگيالىق ينستيتۋتىنىڭ عالىمى سارا ريۆز (Sarah Reaves) بەن ونىڭ ارىپتەستەرى ءارتۇرلى دىبىس قوزدىرعىشتار مەن الاڭداتاتىن دىبىستار قوسىلعان كەزدە كوللەدج ستۋدەنتتەرى مەن ەگدە جاستاعى ادامداردىڭ ەستە ساقتاۋ قابىلەتىندە قانداي وزگەرىستەردىڭ بولاتىنىن باقىلاپ كورگەن.
عالىمدار زەرتتەۋىنىڭ ناتيجەلەرى ەرەسەكتەر مەن ەگدە جاستاعى ادامداردىڭ مۋزىكا ويناپ تۇرعان جەردە اقپاراتتى ەستە ساقتاي المايتىنىن كورسەتتى. ءتىپتى، مۇنداي جەردە قاراپايىم نارسەلەردىڭ ءوزىن، مىسالى بىرەۋدىڭ ەسىمىن نەمەسە ءتۇرىن ەستە ساقتاپ قالۋ دا ولارعا قيىندىق تۋعىزادى.
«جاسى ۇلعايعان سايىن قاريالاردا دىبىس كوزىن جانە دىبىستىڭ شوعىرلانۋىن قابىلداۋمەن بايلانىستى پروبلەمالاردىڭ تۋىندايتىنىن ءبىز جاقسى بىلەمىز. بۇعان قوسا، اسسوتسياتيۆتىك ەستە ساقتاۋ قابىلەتى جاس ۇلعايعان سايىن ناشارلاي بەرەدى»، - دەيدى ريۆز.
ەكسپەريمەنت بارىسىندا شاراعا قاتىسۋشىلارعا ادام ەسىمدەرىمەن بايلانىستى سۋرەتتەر كورسەتىلدى، بۇل كەزدە اسپاپتى مۋزىكا نەمەسە اۋەن قوسىلىپ تۇردى. ءبىراز ۋاقىتتان كەيىن عالىمدار باسقا ەسىمدەر مەن سۋرەتتەردى كورسەتىپ، دۇرىس جازىلىپ-جازىلماعانىن سۇرادى. بۇل تاجىريبەنىڭ ناتيجەسى، مۋزىكا قوسىلىپ تۇرسا دا، تۇرماسا دا جاستاردىڭ اقپاراتتى تولىقتاي ەستە ساقتاپ قالاتىنىن، ال ەگدە جاستاعى ادامدارعا مۋزىكانىڭ كەدەرگى بولاتىنىن كورسەتتى.
عالىمداردىڭ ايتۋىنشا، تىنىش جەردە ەستە ساقتالعان اقپاراتتىڭ كورسەتكىشى مۋزىكا ويناپ تۇرعان كەزدەگىدەن 10 پايىزعا جوعارى.
«قارتتار ءۇيىنىڭ قىزمەتكەرلەرى بۇل جاعدايدى ەسكەرۋلەرى ءتيىس. بالكىم ولارعا قاريالارمەن سويلەسۋ كەزىندە مۋزىكانى قوسپاۋ كەرەك شىعار. ەگدە جاستاعى ادامدارعا شۋلى كافە نەمەسە وزگە دە قوعامدىق ورىنداردا ىسكەرلىك كەزدەسۋگە بارۋعا بولمايدى. كولىك جۇرگىزىپ كەلە جاتىپ اداسىپ كەتكەن كەزدە دە مۋزىكانى ءوشىرىپ قويۋ كەرەك»، - دەيدى ريۆز.