ەسكە سالا كەتەيىك، سەرىك احمەتوۆ اسا ءىرى كولەمدە بيۋدجەت قارجىسىن جىمقىردى دەپ ايىپتالعان بولاتىن.
12 - اقپاندا ەكس-مينيستر مەن ونىڭ قورعاۋشىلارى قىلمىستىق ءىستىڭ ماتەريالدارىمەن تانىسۋدى باستادى. «قىلمىستىڭ ءىستىڭ كولەمى وتە ۇلكەن، 10 تومنان اسادى. سوندىقتان ول (احمەتوۆ. - اۆتور) ءبىر-ەكى كۇندە تانىسىپ ۇلگەرمەيدى. ال «ءۇي قاماۋىنا الۋ» بۇلتارتپاۋ شاراسىنىڭ مەرزىمى 18 - اقپاندا اياقتالادى. وسىعان بايلانىستى ءبىز سوتقا ءۇي قاماۋىنا الۋدىڭ مەرزىمىن ۇزارتۋ تۋرالى وتىنىشپەن قايتا ارىزدانۋعا مىندەتتىمىز. ءبىراق ءبىز ناقتى مەرزىمىن كورسەتپەيمىز. سەرىك احمەتوۆكە قانشا ۋاقىتتىڭ كەرەگىن ول ءوزى شەشەدى، بۇل تۋرالى ونىڭ قورعاۋشىلارى سانكتسيالاۋ پروتسەسىندە سوتقا حابارلايدى»، - دەدى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ تەرگەۋ دەپارتامەنتىنىڭ وسى قىلمىستىق ءىستى زەرتتەۋ ءۇشىن قاراعاندىعا ءىسساپارعا جىبەرىلگەن وكىلدەرى.
ءۇي قاماۋىنا الۋ مەرزىمىن ۇزارتۋ تۋرالى ماسەلە 13 - اقپاندا شەشىلەدى. وسىدان كەيىن، سەرىك احمەتوۆكە اسا ءىرى كولەمدە بيۋدجەت قارجىسىن جىمقىردى دەگەن ايىپ رەسمي تۇردە تاعىلادى دەپ كۇتىلىپ وتىر. كۇدىكتى مەملەكەتتىك قىزمەتتە ادال جۇمىس ىستەدىم دەپ ءوز كىناسىن مويىنداعان جوق.
تەرگەۋشىنىڭ ءوتىنىشى بويىنشا، 2012 -جىلى «مەتاللۋرگيا- مەتالل وڭدەۋ» يندۋستريالىق پاركى اۋماعىندا ينفراقۇرىلىمنىڭ، اتاپ ايتقاندا، كارىز جۇيەلەرىنىڭ قۇرىلىسى جۇرگەن. تەرگەۋدىڭ مالىمەتىنشە، قاراعاندى وبلىسى اكىمدىگىنىڭ باسشىسى مەن وبلىستىڭ بۇرىنعى اكىمى سەرىك احمەتوۆ الدىن الا ءسوز بايلاسىپ، قوسالقى مەردىگەر - «سەنترستروي- كومپلەكت نس» ج ش س چەح جابدىعىن ارزان جابدىقپەن اۋىستىرعان.
جابدىقتىڭ ەكى ءتۇرىنىڭ اراسىنداعى 1 ميلليارد 200 ميلليون تەڭگە كولەمىندەگى ايىرمانى كۇدىكتىلەر ءوزارا يەمدەنگەن. تەرگەۋ مالىمەتتەرى بويىنشا، قىلمىستى جاسىرۋ ءۇشىن دەلدال فيرمالار جەلىسىن اشىپ، ولاردىڭ شوتىنا اقشانى اۋدارۋ ارقىلى بيۋدجەت قاراجاتىن جىلىستاتۋدىڭ سحەماسىن جاساعان.
ەسكە سالا كەتەيىك، سەرىك احمەتوۆ قاراعاندى وبلىسىنىڭ اكىمى قىزمەتىنەن 2011 -جىلى بوساتىلدى، سودان كەيىن ق ر پرەمەر-ءمينيسترىنىڭ ورىنباسارى بولىپ تاعايىندالدى. 2012 -جىلى پرەمەر-مينيستر قىزمەتىنە كىرىستى. 2014 - جىلدىڭ ساۋىرىندە سەرىك احمەتوۆ ق ر قورعانىس ءمينيسترى بولىپ تاعايىندالىپ، 22 - قازان كۇنى بۇل قىزمەتتەن ءوز ەركىمەن كەتتى.