قازاقستاندىقتار شەتەلدەگى زياتكەرلىك مەنشىك قۇقىعىنا پاتەنتتى تىركەي الاتىن بولادى
بۇگىن سەناتتىڭ كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ كەڭەيتىلگەن وتىرىسىنان كەيىن جۋرناليستەرگە بەرگەن سۇحباتىندا سەناتور ليۋدميلا پولتوراباتكو وسىلاي ءمالىم ەتتى. ەسكە سالايىق، كوميتەتتە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە زياتكەرلىك مەنشىك سالاسىن قۇقىقتىق رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلانعان بولاتىن.
«زاڭ جوباسىنداعى باستى جاڭالىقتاردىڭ ءبىرى ەلىمىزدىڭ ىشىندە عانا ءبىر رەت تىركەلىپ، «پاتەنت» ۇعىمىن يەلەنگەن يننوۆاتسيالىق پاتەنتتى قايتا تىركەۋدەن وتكىزۋدى الىپ تاستاۋ كوزدەلەدى. ياعني، ازاماتتار ەندىگى كۇنى پاتەنتتەرىن تەك ءبىزدىڭ ەلىمىزدە عانا ەمەس، شەت ەلدەردە دە تىركەي الاتىن مۇمكىندىككە يە. وسىعان بايلانىستى، شەت ەلدەردەگى تىركەلگەن پاتەنتتەردىڭ ەندى ءبىزدىڭ ەلىمىزدە دە كۇشى بار بولادى»، - دەدى ل. پولتوراباتكو.
بۇدان بولەك، زاڭ جوباسىنىڭ ماقساتى تىركەۋ ءراسىمىن وڭايلاتۋ جانە قۇقىقتىق ولقىلىقتاردى جويۋ، سونداي-اق زياتكەرلىك مەنشىك سالاسىندا اكىمشىلىك كەدەرگى كەلتىرەتىن نورمالاردى الىپ تاستاۋ بولىپ تابىلادى. ماسەلەن، اۆتورلىق قۇقىق سالاسىندا ەنگىزىلەتىن تۇزەتۋلەر ۇجىمدىق ۇيىمداردىڭ قىزمەتىن ناقتىلاۋعا باعىتتالادى. بۇل رەتتە قولدانىستاعى زاڭنامادا ۇجىمدىق نەگىزدە مۇلىكتىك قۇقىقتاردى باسقاراتىن ۇيىمداردىڭ (ۇجىمدىق ۇيىمدار) اۆتورلىق قۇقىق پەن ساباقتاس قۇقىقتار وبەكتىلەرىن پايدالانعانى ءۇشىن اۆتورلىق سىياقىنى جيناۋ، ءبولۋ جانە تولەۋ بويىنشا مىندەتى بەلگىلەنگەن.
سونىمەن قاتار زاڭ جوباسى بويىنشا ۇجىمدىق ۇيىمدار تاراپىنان اسىرا پايدالانۋدى جويۋ شارالارى كوزدەلەدى. ماسەلەن، ۇيىمنىڭ سىي اقىنى جيناۋ، ءبولۋ جانە تولەۋ بويىنشا ءوزىنىڭ ناقتى شىعىستارىن وتەۋگە جينالعان سىياقىدان ۇستالاتىن سومانىڭ شەكتى پايىزىن بەلگىلەۋ ۇسىنىلادى. حالىقارالىق تاجىريبەنى ەسكەرە وتىرىپ، ونى جينالعان سىياقى سوماسىنىڭ 30 پايىزىنان اسپايتىن مولشەرىندە بەلگىلەۋ ۇسىنىلىپ وتىر.
زاڭ جوباسى الداعى ۋاقىتتا وتەتىن پالاتانىڭ جالپى وتىرىسىنا شىعارىلادى.
اۆتور: قانات مامەتقازى ۇلى