قىتايداعى قازاق ادەبيەتىنە ۇلەس قوسقان قالامگەرلەر ماراپاتتالدى - بەيجىڭ

استانا. قازاقپارات - بەيجىڭدە قىتاي از ۇلتتار جازۋشىلار قوعامى مەن «اقساي» قازاق ادەبيەتى قوعامى ۇيىمداستىرعان بايقاۋدىڭ ماراپاتتاۋ ءراسىمى ءوتتى.

مۇندا جەرگىلىكتى قازاق قالامگەرلەرىنىڭ پروزا، پوەزياداعى ءتول تۋىندىلارى مەن قىتاي-قازاق ادەبيەتىندەگى تىڭ شىعارمالار، تاڭدامالى اۋدارمالار باعالاندى، دەپ حابارلايدى 24.kz.

بايقاۋدا ءبىر جىل بويى از ۇلتتار تىلىندە باسىلىپ شىققان 107 ادەبي شىعارما سارالانىپ، قازىلار القاسى قازاق باسىلىمىنان 5 اۆتوردىڭ شىعارماسىن ۇزدىك دەپ تانىدى.

باس جۇلدە - 20 مىڭ ا ق ش دوللارىن ەرلان نۇرجىحان ۇلىنىڭ «كولەڭكە كوزىندەگى ەلەس» جىر جيناعى ەنشىلەدى. ال ايدوس امانتاي ۇلىنىڭ قىتايشا جازىلعان «ايدوس- شولپان» رومانى جاس قالامگەرلەر اراسىنان ۇزدىك شىقتى.

«بۇل سىيلىق قىتاي- قازاق ادەبيەتىنىڭ كوركەيىپ كەلە جاتقانىن بىلدىرەدى ءارى بولاشاقتا ودان ءارى دامۋىنا كۇش بەرەدى دەپ ويلايمىن»، - دەيدى جازۋشى ايدوس امانتاي ۇلى.