الماتىدا كاسىپكەرلەرگە ارنالعان سايتتىڭ تانىستىرىلىمى ءوتتى

الماتى. قازاقپارات - جاڭا بيزنەس پورتال ق ر پرەمەر-ءمينيسترىنىڭ ءبىرىنشى ورىنباسارى باقىتجان ساعىنتايەۆتىڭ الماتى بيزنەس قاۋىمداستىعىمەن كەزدەسۋى بارىسىندا تانىستىرىلدى.

جيىن بارىسىندا سالالىق مينيسترلىكتەر مەن بيزنەس وكىلدەرى كاسىپكەرلىكتى دامىتۋ بويىنشا ۇكىمەتتىڭ كەشەندى شارالارىن تالقىلادى.

«دامۋ» قورىنىڭ باسقارما ءتوراعاسى ءلاززات يبراگيموۆا جاڭا www.doingbusiness.gov.kz  ينتەرنەت-رەسۋرسىن جان-جاقتى تانىستىردى. اتالعان اقپاراتتىق پورتالدا قازاقستانداعى بيزنەس-كليمات تۋرالى، سالىق، رۇقسات بەرۋ جۇيەسىنىڭ ەرەكشەلىكتەرى مەن سەرتيفيكاتتار جايلى اقپارات ورنالاستىرىلادى.

«ازىرگە پورتال جەتىلدىرىلۋ ۇستىندە. ءبىراق قازىردىڭ وزىندە ودان پايدالى اقپارات تابۋعا بولادى»، - دەدى ل. يبراگيموۆا.

تەك وتاندىق قانا ەمەس، شەتەلدىك كاسىپكەرلەرگە دە پايدالى بولاتىن جاڭا ينتەرنەت رەسۋرسى ازىرگە تەستىلىك رەجىمدە جۇمىس جاساپ تۇر. اقپارات قازاق، ورىس، اعىلشىن تىلدەرىندە قولجەتىمدى.

اۆتور: گۇلميرا عوسمانالي