تۋرنيرگە قاتىسۋعا رەسەي، بەلارۋس، اۆستراليا، مىسىر، ا ق ش-تان جانە وتاندىق حالىقارالىق دارەجەدەگى گروسسمەيستەرلەر، ءار جىلدارداعى چەمپيوندار جينالدى.
- پاۆلودار قالاسىندا شاحماتتان ۇلكەن جارىس وتكىزۋ ءبىز ءۇشىن ەرەكشە مارتەبە. شاحمات ويىنى - تەرەڭ اقىل مەن ءبىلىم شايقاسى. بۇل تۋرنيرگە الەمنىڭ ەڭ مىقتى شاحماتشىلارى قاتىسادى. ءبىزدىڭ وڭىردەن تانىمال جانە مىقتى شاحماتشىلار شىعادى دەپ سەنەمىز. بارلىق قاتىسۋشىلارعا تابىس پەن جەڭىس تىلەيمىن! - دەدى جارىستىڭ سالتاناتتى اشىلۋ راسىمىنە قاتىسقان وبلىس اكىمى قانات بوزىمبايەۆ.
شاحمات ويىنى 9 تۋردان تۇراتىن اينالما جۇيە بويىنشا وتەدى. باقىلاۋ ۋاقىتى: ءبىرىنشى جۇرىستەن باستاپ ءار ءجۇرىس ءۇشىن 10 سەكۋند قوسىمشا ۋاقىتپەن پارتيا اياعىنا دەيىن - 15 مينۋت. جارىس حالىقارالىق شاحمات فەدەراتسياسىنىڭ ەرەجەلەرى بويىنشا وتكىزىلەدى.
تۋرنيردىڭ جۇلدە قورى 3 ميلليون تەڭگە. ول 30 - قاڭتارعا دەيىن جالعاسپاق.
حالىقارالىق سپورت دوداسىن پاۆلودار وبلىسىنىڭ اكىمدىگى، پاۆلودار وبلىسىنىڭ دەنە تاربيەسى جانە سپورت باسقارماسى، پاۆلودار وبلىسىنىڭ شاحمات فەدەراتسياسى ۇيىمداستىرىپ وتىر.