ينۆەستيتسيالار جانە دامۋ ۆيتسە- ءمينيسترى البەرت راۋدىڭ ايتۋىنشا، زاڭ جوباسىنا سايكەس، قۇرامىندا باعالى مەتالدار بار شيكىزاتتىق تاۋارلار ەلگە اكەلىنگەندە، شىعارىلعاندا مەملەكەتتىك باقىلاۋدا بولادى.
«اتاپ ايتقاندا، ەگەر جەكە نەمەسە زاڭدى تۇلعا قۇرامىندا باعالى ماتەريال بار شيكىزاتتى، تاۋارلاردى ەلدەن الىپ وتكىسى كەلسە، وندا ونداي تۇلعالار ەلىمىزدەگى وڭدەۋشى كومپانيالاردان اتالعان شيكىزاتتى وڭدەۋدەن باس تارتقانىن راستايتىن قۇجات الۋعا مىندەتتى. سونىمەن قاتار، يمپورتتاۋشى كومپانيالار شەت مەملەكەتتەردىڭ اۋماعىندا وڭدەگەن التىندى قازاقستاننىڭ ۇلتتىق بانكىنە ساتۋعا مىندەتتەيتىن نورما دا ەنىپ وتىر. سونداي- اق زاڭ جوباسىمەن ۇلتتىق بانكتىڭ اتالعان تازارتىلعان التىندى ساتىپ الۋداعى باسىمدىق قۇقىعى دا بەكىتىلەدى»، - دەدى ۆيتسە- مينيستر.
ا. راۋدىڭ سوزىنە قاراعاندا، قازاقستاندا وندىرىلگەن التىن شەت ەلدەرگە ەكى جاعدايدا وڭدەلۋى مۇمكىن. ونىڭ ءبىرى - ەلىمىزدەگى زاۋىتتار تەحنولوگيالىق سەبەپتەرىنە قاراي التىن وڭدەي المايتىن بولسا. ەكىنشىدەن، ەۋرازيالىق ەكونوميكالىق وداق اۋماعىندا زاڭدى تۇلعالار التىندى وداققا مۇشە ەلدەرگە شىعارا الادى.
«دەگەنمەن، التىن سىرتقا شىعارىلعان جاعدايدا دا، ونى ساتىپ الۋداعى ۇلتتىق بانكتىڭ باسىمدىعى ايقىندالىپ وتىر. ياعني، التىن سىرتقا شىعارىلسا دا، ونى قايتا ەلگە اكەلۋگە تۋرا كەلەدى، سوندىقتان ونى شىعارماس بۇرىن، قازاقستاندا وڭدەۋ مۇمكىندىگىنە جول اشىلادى»، - دەدى ا. راۋ.
اۆتور: قانات مامەتقازى ۇلى