بۇل تۋرالى بۇگىن ماجىلىستە «قىمبات مەتالدار جانە قىمبات تاستار تۋرالى» زاڭ جوباسىنىڭ تانىستىرىلىمى بارىسىندا ءمالىم بولدى.
ينۆەستيتسيالار جانە دامۋ ۆيسە- ءمينيسترى البەرت راۋدىڭ ايتۋىنشا، بۇگىنگى كۇنى ۇكىمەت التىن مەن قۇرامىندا التىنى بار شيكىزاتتى ەلدەن اكەتۋگە ۋاقىتشا تىيىم سالعان.
«بۇل بىلتىرعى جىلى قابىلدانعان تىيىم بولاتىن، 2015 - جىلدىڭ ورتاسىنا تامان مەرزىمى اياقتالادى. ءبىراق، ءبىز بۇل تىيىمدى جىل سوڭىنا دەيىن ۇزارتۋعا نيەتتىمىز. دەگەنمەن، بۇل جەردە تىيىمعا جاتپايتىن ءبىر عانا ماسەلە - التىنى بار شيكىزاتتاردى رەسەيگە تاسىمالداۋ. ويتكەنى، ءبىزدىڭ مەتالداردى وڭدەيتىن جەكەلەگەن كومپانيالار رەسەيدە ورنالاسقان ءارى ولاردىڭ سانى دا كوپ ەمەس»، - دەيدى ا. راۋ.
ءوز كەزەگىندە ينۆەستيتسيالار جانە دامۋ مينيسترلىگى يندۋستريالىق دامۋ جانە ونەركاسىپ كوميتەتىنىڭ ءتوراعاسى قانات بايىتوۆتىڭ ايتۋىنشا، تىيىم نەگىزىنەن استاناداعى اففيناجدى زاۋىتتى شيكىزاتپەن قامتاماسىز ەتۋ ماقساتىندا ەنگىزىلگەن.
اۆتور: قانات مامەتقازى ۇلى