تۇركيادا تۇڭعىش رەت قازاق قىزى سۋديا بولىپ سايلاندى
ەندى ول تۇرىك ەلىنىڭ وڭتۇستىك بولىگىندە ورنالاسقان حاتاي پروۆينتسياسىنىڭ نيزيپ اۋدانىنىڭ سوت ماسەلەلەرىن قاراستىراتىن بولادى.
تۇركيادا سۋديا مەن پروكۋرورلاردى تاعايىنداۋ وزگە ەلدەرگە قاراعاندا وزگەشەلەۋ وتەدى. الدىمەن ۇمىتكەر مەملەكەتتىك بىرنەشە سىناقتاردان ءوتىپ، 15 ايلىق تاجىريبەگە قاتىسۋى مىندەتتى. بۇل سىننان سۇرىنبەي وتكەندەردىڭ ەسىمدەرى الدىمەن كومپيۋتەرگە ەنگىزىلەدى. كەيىن، بارلىعى ءادىل بولسىن دەپ، ۇمىتكەردى قاي قالاعا سۋديا نەمەسە پروكۋرور قىلىپ سايلاۋ تەحنيكاعا جۇكتەلەدى. كوپشىلىك الدىندا تۇرىك ەلىنىڭ 81 قالاسى بەينەلەنگەن الىپ كارتا. قىزىل ءتۇس قاي ايماققا توقتاسا، بولاشاق زاڭ قىزمەتكەرى سول جاقتا جۇمىس ىستەيدى.
سۋديا نەمەسە پروكۋرور بولۋ وتە جاۋاپتى قىزمەت. بۇل جۇيە ءبىزدىڭ تاجىريبەمىزدە بىرنەشە جىلدان بەرى قولدانىلىپ كەلەدى. ۇمىتكەرلەردى كوميۋتەر ارقىلى تاعايىنداۋ مەنىڭ ويىمشا ەڭ ءادىل شەشىم. سەبەبى، بۇل جەردە باستىسى - جەمقورلىق جويىلادى. ياعني، بىرەۋ تانىس ارقىلى قالاعان اۋدانىنا بارا المايدى دەگەن ءسوز. بارلىعىندا تەحنيكا شەشەدى - دەيدى تۇركيانىڭ سۋديالار جانە پروكۋرورلار جوعارعى كەڭەسىنىڭ باس حاتشىسى بيلگين باشاران.
سۋديالىقتان ۇمىتكەر زاڭگەرلەردىڭ اراسىنان قانداسىمىز كامشات يىگىتتىڭ دە باعى جاندى. تۇركياعا وقۋعا كەلگەن قازاق قىزى وسى جاقتا بولاشاق جارىن كەزدەستىرىپ وتاۋ قۇردى. ال 2010 -جىلى تۇرىك ەلىنىڭ ازاماتتىعىن العان بولاتىن. ەندى مىنەكي ەكىنىڭ ءبىرىنىڭ قولىنان كەلە بەرمەيتىن سىناقتى ابىرويىمەن تاپسىرىپ، اسقاق ارمانىنا قول جەتكىزدى. بارلىقتارىڭىز كورىپ تۇرعانداي، وسى جەردە كومپيۋتەر ارقىلى بارلىعىمىز تاعايىندالدىق. مەن تۇركياداعى حاتاي قالاسىنىڭ نيزيپ دەگەن اۋدانىنا تاعايىندالدىم. ەندى بارلىعىمىز سول جاققا قىزمەتكە بارا جاتىرمىز. ول جاقتا 2 جىل 10 اي جۇمىس ىستەۋىمىز كەرەك دەيدى قانداسىمىز كامشات يىگىت.
سايلانعان ايماقتارىندا 3 جىلداي قىزمەت ەتكەن سوڭ، زاڭگەرلەر تۇركيانىڭ سۋديالار جانە پروكۋرورلار جوعارعى كەڭەسىنىڭ ەل بويىنشا ورنالاسقان 13 بولىمشەسىنىڭ بىرىندە جۇمىس ىستەيدى. بۇل جولعى تاڭداۋدى ولار وزدەرى جاسايتىن بولادى.
Baq.kz