بايان- ولگەي تۇرعىندارى ورىس ءتىلىن ۇيرەنۋگە بەت بۇردى

استانا. قازاقپارات - موڭعوليانىڭ قانداستارىمىز تىعىز قونىستانعان ولگي قالاسىندا ورىس ءتىلى ورتالىعى اشىلدى.

بۇل تۋرالى www.baiolke.com سايتى حابارلاپ وتىر.

 ايماق اكىمى دارمەن قۇزىكەي ۇلىنىڭ وتكەن جىلدىڭ قازان ايىندا رەسەيدىڭ التاي ولكەسىنە جاساعان ءىس- ساپارى بارىسىندا بايان- ولگيدە ورىس ءتىلى ورتالىعىن اشۋ ماسەلەسى سويلەسىلىپ، التاي ولكەسىنىڭ اكىمشىلىگى مەن التاي مەملەكەتتىك تەحنيكالىق ۋنيۆەرسيتەتى تاراپىنان قولداۋ تاپقان بولاتىن.

 بۇل ورتالىقتا بولاشاقتا رەسەيدەن ءبىلىم العىسى كەلەتىن وقۋشىلارعا جانە وزگە دە قىزىقتاۋشى ازاماتتارعا ورىس ءتىلىن ۇيرەتۋ، ورىس ەلىن تانىستىرۋ سەكىلدى جۇمىستار جۇرگىزىلەدى دەپ كۇتىلۋدە. وسى جۇمىستىڭ باستاماسى رەتىندە ايماقتىق ماماندىق باعدار بەرۋ، وقۋ، وندىرىستىك ورتالىعىندا ورىس ءتىلى ورتالىعىنىڭ اشىلۋ سالتاناتى بولدى.

سالتاناتتى راسىمگە ايماقتىق اكىمدىكتىڭ ءىس باسقارماسىنىڭ اكىمشىلىك جانە باسقارما ءبولىمىنىڭ باسشىسى ق. مانتاي، ماماندىق باعدار بەرۋ، وقۋ، وندىرىستىك ورتالىعىنىڭ ديرەكتورى ر. گۇلستان، التاي مەملەكەتتىك تەحنيكالىق ۋنيۆەرسيتەتىنىڭ يۋنەسكو فاكۋلتەتىنىڭ دەكانى، پروفەسسور ميحايل يۋرييەۆيچ شيشين، اتالعان وقۋ ورنىنىڭ گۋمانيتارلىق عىلىمدار فاكۋلتەتىنىڭ دەكانى الەكساندر نيكولايەۆيچ دۋنەتس جانە ايماق ورتالىعىنداعى مەكتەپتەردىڭ ورىس ءتىلى ءپانىنىڭ ۇستازدارى قاتىستى.

سالتاناتتى ءراسىم قارساڭىندا رەسەيدەن كەلگەن قوناقتار جاڭادان اشىلعان ورىس ءتىلى ورتالىعىنا LED تەلەۆيزور، ءارتۇرلى كىتاپتار تابىس ەتتى. بولاشاقتا اتالعان ورتالىق رەسەي ەلىنىڭ قايتارىمسىز كومەگى نەگىزىندە تولىق كىتاپحانامەن جابدىقتالاتىن بولادى. ال ورتالىقتا قىزمەت اتقاراتىن مۇعالىمدەردىڭ ەڭبەكاقىسىن شەشۋ ماسەلەسىن ەكى تاراپ بىرلەسىپ قاراستىرىپ جاتىر.