كولىك ايداۋدى ۇيرەنىپ ءجۇرىپ كوزىنەن «ايىرىلعان» ۇلى بريتانيالىق ايەل
12:08, 13 - قاڭتار 2015
استانا. قازاقپارات - سولتۇستىك ۋەلستە كولىك ايداۋدى ۇيرەنىپ جۇرگەن ايەلدىڭ كوز الماسى جارىلىپ كەتتى، دەپ حابارلايدى BNews.kz.
30 جاستاعى ليز حودجكينسون وقۋ اۆتوكولىگىنىڭ تىزگىنىندە وتىرعان كەزدە كوزىنىڭ كەنەتتەن اۋىرىپ كەتكەنىن سەزەدى. جۇرگىزۋشىنىڭ كوز الماسى كولىك قوزعالىسى كەزىندە جارىلىپ كەتكەن.
اۋرۋحانا دارىگەرلەرى كوزدىڭ قاساڭ قابىعىنىڭ ءتۇسىپ كەتكەنىن ايتتى. حيرۋرگتەر ايەلگە كەراتوكونۋس دياگنوزىن قويعان.
قاساڭ قابىقتى قالپىنا كەلتىرۋ ءۇشىن دارىگەرلەر ونى الماستىرىپ، 50 رەت تىگىپتى.
«وتباسىمدا مۇنداي اۋرۋمەن اۋىرعاندار بولعانىن بىلەتىنمىن، الايدا ءدال وسىنداي جاعداي مەنىڭ دە باسىمنان وتەدى دەگەن ءۇش ۇيىقتاسام دا تۇسىمە كىرمەپتى»، - دەيدى كاسىبي سۋرەتشى ليز حودجكينسون.
كەراتوكونۋس وتە سيرەك كەزدەسەتىن اۋرۋ، ادەتتە كوزدىڭ قاساڭ قابىعى فورماسىن وزگەرتىپ، كونۋس تۇرىندە العا قاراي سوزىلىپ كەتەدى. مۇنداي اۋرۋعا 2000 ادامنىڭ ىشىندە تەك بىرەۋى عانا شالدىعۋى مۇمكىن.