استانا قالاسى ت ج د مەملەكەتتىك ءتىل جانە اقپارات توبى حابارلاعانداي، 9 - قاڭتاردا ساعات 15:46-تا استانالىق ءورت ءسوندىرۋ قىزمەتىنە بەيىمبەت مايلين 7/2 كوشەسىندە ورنالاسقان تۇرعىن ءۇيدىڭ پاتەرىندە ءورت بولىپ جاتىر دەگەن حابار ءتۇستى.
وقيعا ورنىنا ءورت سوندىرۋشىلەر كەلگەن كەزدە تەرەزەدەن قويۋ قارا ءتۇتىن بۋداقتاپ جاتقانى كورىندى. قۇتقارۋشىلار پاتەردە ءورت شىعىپ، بالانىڭ ۇيدە قالىپ قويعانىن انىقتادى. ورتكە قارسى قىزمەت اعا سەرجانتى ت. ج. قاراعوزين ءوزىنىڭ شەبەرلىگى مەن جوعارى بىلىكتىلىگىن كورسەتىپ، 4-قاباتقا ءورت ءسوندىرۋ باسپالداعىمەن كوتەرىلىپ بالانى قۇتقاردى.
ول №10-ءورت ءسوندىرۋ ءبولىمىنىڭ قۇتقارۋشىلارى وقيعا ورنىنا جەتكەنگە دەيىن وعان قاۋىپ تونبەۋى ءۇشىن بالعىننىڭ جانىندا بولدى. ءورت سوندىرۋشىلەر تەمىر ەسىكتى بۇزىپ كىرىپ، ءورتتى اۋىزدىقتادى. ءورت سوندىرۋشىلەر وقيعاعا جەدەل ارالاسىپ، مىقتى ستراتەگيا مەن بىلىكتىلىكتىڭ ارقاسىندا 2006 - جىلى تۋعان بالانى ولىمنەن الىپ قالدى.
ازاماتتاردىڭ بەيجايلىعى جانە قاۋىپسىزدىككە نەمقۇرايلى قاراۋىنىڭ سالدارىنان جاقىندارىنىڭ ءومىرى مەن مۇلىگىنە قاۋىپ توندىرەدى. استانا قالاسىنىڭ توتەنشە جاعدايلار دەپارتامەنتى دەنساۋلىق پەن مۇلىككە ساق بولۋعا شاقىرادى.
www.24.kz