پوليتسيا پاريجدەگى لاڭكەستەردىڭ ولتىرىلگەنى بەينەلەنگەن كەسكىندى جاريالادى
بۇل جەردە Charlie Hebdo رەداكسياسىنا شابۋىل جاسادى دەگەن كۇدىكتىلەر اعايىندى كۋاشيلەردىڭ كوزى جويىلدى. بۇل تۋرالى LifeNews حابارلادى.
GIGN ارنايى قىزمەتى لاڭكەستەردىڭ ادامداردى كەپىلگە الىپ، قاماپ وتىرعان جەكە باسپاحاناعا شابۋىلدى توعىزىنشى قاڭتاردا جاسادى. ءتارتىپ ساقشىلارى شابۋىلعا بىرنەشە ساعات دايىندالدى. وقيعا بولعان جەر قورشاۋعا الىنىپ، كورشى ۇيلەردىڭ توبەلەرىنە سنايپەرلەر شىقتى. ارنايى قىزمەت كۇدىكتىلەردى ءتىرى كۇيىندە ۇستاعىسى كەلدى، ءبىراق لاڭكەستەر ولۋگە دە بار ەكەنىن مالىمدەدى.
پوليتسەيلەر عيماراتتىڭ توبەسىنەن ورىن العان كەزدە اعايىندى لاڭكەستەر شابۋىلعا شىعىپ، وق اتا باستادى. بىرەر ساتتەن كەيىن لاڭكەستەر ءولتىرىلدى. كەپىلگە الىنعان ادام زارداپ شەككەن جوق.
مۇنىمەن قاتار، جەلىدە فرانسيا پوليتسياسىنىڭ وپەراتسياسى بەينەلەنگەن باسقا ۆيدەو پايدا بولدى. وپەراتسيا پاريجدەگى سۋپەرماركەتتە ءوتتى. دۇكەندە 32 جاستاعى افريكالىق امەدي كۋليبالي شامامەن 20 ادامدى كەپىلگە العان بولاتىن. كۋليبالي فرانسۋز بيلىگىنەن اعايىندى سايد پەن شەريف كۋاشيلەردى اڭدۋىن دوعارۋدى تالاپ ەتكەن ەدى.
لاڭكەستىڭ كوزىن جويۋ وپەراتسياسىن France 3 تەلەارناسىنىڭ رەپورتەرلەرى ۆيدەوعا ءتۇسىرىپ الدى. ۆيدەودا GIGN جاۋىنگەرلەرىنىڭ سودىردى اتىپ جاتقانىن كورۋگە بولادى. كەپىلگە الىنعان بىرنەشە ادام قۇتقارىلدى، ءبىراق كۋليبالي دۇكەنگە پوليتسەيلەر شابۋىل جاساماي تۇرعاندا ءتورت ادامدى اتىپ تاستاعان بولاتىن.
وسىعان دەيىن France 2 تەلەارناسى پاريج سۋپەرماركەتىندەگى لاڭكەستىڭ ءولتىرىلۋ ءساتى بەينەلەنگەن ۆيدەونى جاريالاعان، ءبىراق GIGN جاۋىنگەرلەرىنىڭ لاڭكەستى اتىپ جاتقان تۇسى ءوشىرىلدى. ناتيجەسىندە جۇگىرىپ شىققان امەدي كۋليبالي لاڭكەس ەمەس، كەپىلگە الىنعان ادام سياقتى بولىپ كورىندى.
ارنايى وپەراتسيانىڭ الدىندا كۋليبالي BFM TV تەلەارناسىنىڭ جۋرناليستەرىنە «يسلام مەملەكەتى» توبىنىڭ مۇشەسى ەكەنىن، ال ونىڭ فرانسياداعى ءىسىن بەلگىلى راديكال ءارى ۋاعىزشىسى انۆار ءال-اۆلاكي ەكەنىن حابارلادى. ايتا كەتەيىك، ا ق ش ارنايى قىزمەتى ونى نومەرى ءبىرىنشى لاڭكەس دەپ اتاعان. كۋليبالي ءوزىنىڭ ارەكەتىن اعايىندى كۋاشيلەرمەن بايلانىستىرعانىن دا مويىندادى. ياعني اعايىندى لاڭكەستەر Charlie Hebdo رەداكسياسىنا شابۋىل جاساعان كەزدە امەدي مونرۋجدە پوليتسەيدى اتىپ تۇسىرگەن.
قازىرگى ۋاقىتتا ەل پوليتسياسى 26 جاستاعى حايات بۋمەدەندى ىزدەستىرىپ جاتىر. ول - امەدي كۋليباليدىڭ ايەلى.