قازاق بوكسشىلارىنىڭ قارسىلاستارى انىقتالدى
جاڭا جوبا باستالار الدىن APB- نىڭ جەتەكشىلەرى بۇل دودادا ءتورت كەزەڭنەن تۇرادى دەگەن ەدى. ءبىرىنشى كەزەڭ 24- قازاندا وتسە، ەكىنشى كەزەڭ 21- قاراشادا جوسپارلانعان. ءۇشىنشى 20- جەلتوقساندا، ال فينالدىق جەكپە-جەكتەر 2015-جىلدىڭ 30- قاڭتارىنا بەلگىلەنگەن.
سوڭعى ەلەكتىك جەكپە-جەكتەر 20- جەلتوقسان كۇنى تۇندە وتكەنىن بىلەمىز. سودان بەرى فينالدىق كەزەڭگە قاي بوكسشىلاردىڭ شىققاندارى جايلى AIBA تاراپىنان رەسمي اقپارات تاراتىلعان جوق.
سوڭعى دەرەكتەرگە سەنسەك، APB جوباسى ەكىنشى كەزەڭگە دە سوزىلادى- مىس. ەكىنشى كەزەڭ شامامەن جاز ايلارىنا دەيىن جالعاسادى. بۇل كەزەڭدە ءبىرىنشى اينالىمدا ونەر كورسەتكەن بارلىق بوكسشىلار دا قاتىسۋى مۇمكىن. ءبىراق، بۇل ناقتى اقپارات ەمەس. ونى حالىقارالىق اۋەسقوي بوكس فەدەراتسياسى الداعى ۋاقىتتا ءتۇسىندىرىپ وتەتىن بولادى.
كەشە قازاقستان بوكس فەدەراتسياسىنىڭ رەسمي سايتى APB جوباسىندا باقتارىن سىناپ جاتقان بىلعارى قولعاپ شەبەرلەرىمىزدىڭ قارسىلاستارى انىقتالدى دەپ جازىپتى. سونداي-اق وندا وتانداستارىمىز 30-قاڭتار كۇنى جوباداعى ءبىرىنشى اينالىمنىڭ سوڭعى جەكپە-جەكتەرىن وتكىزەدى دەپ ايتىلعان.
ەندى ق ب ف- نىڭ تاراتقان مالىمەتى بويىنشا ءبىرىنشى اينالىمنىڭ سوڭعى جەكپە-جەگىندەگى ءبىزدىڭ بوكسشىلارىمىزدىڭ قارسىلاستارىنا توقتالساق. APB جوباسىندا 60 كەلى سالماقتا ونەر كورسەتىپ، بىردە ءبىر رەت جەڭىلمەگەن وتانداسىمىز بەرىك ءابدىراحمانوۆ وزبەك بوكسشىسى حۋرشود توجيبايەۆپەن قولعاپ تۇيىستىرەدى ەكەن. بۇل جەكپە-جەك 30-قاڭتار كۇنى استانادا وتەدى.
ءدال وسى كۇنى رەسەيدىڭ نوۆوسىبىر قالاسىندا تاعى ءبىر وتانداسىمىز شارشى الاڭعا شىعادى. 52 كەلىدە ونەر كورسەتەتىن ءىلياس سۇلەيمەنوۆ الجيرلىك موحاممەد فليسسيگە قارسى ايقاسادى. ايتا كەتەيىك، ءىلياس بۇل جوبادا ءۇش جەكپە-جەك وتكىزىپ، سونىڭ بىرەۋىندە عانا جەڭىلىپ قالعان. الداعى كەزدەسۋدە جەڭىسكە جەتسە سۇلەيمەنوۆ تە فينالدىق كەزەڭگە وتۋگە مۇمكىندىگى بار.
5-قاڭتار كۇنى АРВ جوباسىنداعى ءبىرجان جاقىپوۆ ءتورتىنشى كەزدەسۋىن وتكىزەدى. 49 كەلىگە دەيىنگى سالماقتا سىنعا تۇسەتىن ءبىرجاننىڭ قارسىلاسى برازيليالىق بىلعارى قولعاپ شەبەرى ۆالەريو لاۋرەنسي بولماق. جاقىپوۆ تا بۇل جەكپە-جەكتە جەڭىسكە جەتسە كەلەر كەزەڭگە ءوتۋى ابدەن ىقتيمال.
فينالدىق كەزەڭگە وتۋگە انتون پينچۋكتىڭ دا ءۇمىتى بار. ءبىراق، 91 كەلىگە دەيىنگى سالماقتا جۇدىرىقتاساتىن انتوننىڭ قارسىلاسى ءالى انىقتالعان جوق ەكەن.
قاينار كەڭشىلىكوۆ
Alashainasy.kz