اقتوبەدە رەسەيلىكتەرمەن بىرلەسىپ امبەباپ شاعىن تراكتور شىعارۋ ءىسى قولعا الىندى

اقتوبە. قازاقپارات - شاعىن تراكتورلار قۇراستىرۋ ءىسىن «تراكتور» م ت س» ج ش س جولعا قويدى.

 سەرىكتەستىك 6 ايداي شاعىن تراكتور قۇراستىرۋعا دايىندالىپ، رەسەيلىك «تراكتور» ا ا ق (چەليابى، رف) كومپانياسىمەن بىرلەسىپ جۇمىس ىستەۋگە كەلىستى.

- رەسەيلىك ارىپتەستەر شاعىن تراكتور قۇراستىرۋ ءۇشىن جيىنتىقتاۋشى بولشەكتەردى جەتكىزەدى. ءبىزدىڭ تەحنيكا اگرو ونەركاسىپتىك كەشەن، كوممۋنالدىق شارۋاشىلىق سالالارى جانە جول جوندەۋ جۇمىستارىنا ارنالعان، ولار جۇمىستىڭ 50 ءتۇرىن اتقارا الاتىن بولادى، - دەدى «تراكتور» م ت س» ج ش س ديرەكتورى سابىرجان بەگىمبايەۆ.

 كومپانيا «ۋرالەتس» شاعىن تراكتورلارىن شىعارادى. بۇل ماركانىڭ نارىقتا جۇرگەنىنە 20 جىل ۋاقىتقا جۋىقتاپتى. بۇل ونىمگە دەگەن سۇرانىس بار، فەرمەرلەر ءۇشىن ونىڭ باعاسى دا ءتيىمدى - 1 ميلليون تەڭگەگە دەيىن عانا.

جاڭا جىل الدىندا وتكەن كورمەگە قويىلعان العاشقى ءتورت تراكتور الماتى، اقساي (ب ق و) ، اقتوبە جانە العاعا ساتىلىپ جونەلتىلدى. كاسىپورىن جىلىنا 500 «ۋرالەتس» پەن وزگە دە تەحنيكا شىعارۋدى كوزدەپ وتىر.