توررەس «رەالعا» قارسى دوپ تەبەدى

استانا. قازاقپارات - بۇگىن ءتۇن اۋا يسپانيا كۋبوگىنىڭ پلەي- وفف كەزدەسۋلەرى وتەدى. جانكۇيەرلەر ءۇشىن ەڭ قىزىقتى ماتچ ءمادريدتىڭ قوس كومانداسى اراسىنداعى ويىن بولماق. «اتلەتيكو مادريد» ءوز الاڭىندا «رەالدى» قابىلدايدى.

«اتلەتيكونى» باپتاپ جۇرگەن فۋتبول مامانى ديەگو سيمەونە بۇگىن كلۋبتىڭ Twitter پاراقشاسىندا فەرناندو توررەستىڭ «رەالعا» قارسى كەزدەسۋدە 1-مينۋتتان الاڭعا شىعاتىندىعىن جاريا ەتتى.

يتاليانىڭ «ميلان» كومانداسىنان ورالعان توررەس جۋىردا جۋرناليستەرگە ءبىر كەزدەرى يسپان كلۋبىنان نە سەبەپتى كەتكەندىگىن ايتىپ، اعىنان جارىلىپتى.

«مەنىڭ «اتلەتيكو» جيدەسىن كيىپ الاڭعا شىقپاعانىما ءبىرشاما ۋاقىت ءوتىپتى. كوپ نارسە وزگەردى. «مادريدتەن» كەتەردە مەن جاس ەدىم. شەشىمىم دە قىزىق بولدى. فۋتبولشى رەتىندە ءوسۋ ءۇشىن ءارى ءوزىمدى كورسەتۋ ءۇشىن سول كەزدەرى كلۋبتان كەتۋىمە تۋرا كەلدى.

وزگە كوماندالاردا كوپتەگەن جۇلدەلەرگە قول جەتكىزسەم دە، بىرنارسە جەتپەي تۇراتىنداي كورىنەتىن ەدى. ونى ەندى ەندى ءتۇسىندىم...

مەن ناعىز ماعان قاجەت جۇلدەنى نەمەسە جەڭىسكە تەك ءوز كوماندام «اتلەتيكومەن» جەتۋىم ءتيىس ەكەن. ەندى وسىعان كىرىسپەكپىن»، - دەيدى توررەس. اۆتورى: نۇربەك بايبوسىن

 

www.khabar.kz