قازاقستانداعى ورتاشا جالاقى رەسەي مەن بەلارۋسكە قاراعاندا جوعارى
ايتا كەتەيىك، سايتتا جاريالانعان كەستەدە ورتاشا جالاقىلار «برۋتتو» جانە «نەتتو» (سالىق تولەنگەننەن كەيىنگى) تۇرىندە كورسەتىلگەن. توپ-50 ءتىزىمىن قۇراستىرۋشىلاردىڭ مالىمەتىنە سايكەس، قازاقستاندا سالىق سوماسى تولەنگەننەن كەيىن ايلىق ورتاشا جالاقى - 441 ەۋرو نەمەسە 96629 تەڭگە، ال «نەتتو» باعانىندا 118844 تەڭگە دەپ كورسەتىلگەن.
ءبىراق رەيتينگ اۆتورلارى قازاقستاندىقتاردىڭ سالىقتى تولەگەننەن كەيىنگى تازا تابىسى نەلىكتەن وزگە ەلدەرگە قاراعاندا جالپى سومادان كوپ بولىپ تۇرعانىن تۇسىندىرمەيدى. ءبىراق مۇنىڭ ءتىزىمنىڭ سيپاتتاماسىندا جازىلعان «از دامىعان ەلدەردە حالىقتىڭ تازا تابىسى رەسمي كورسەتكىشتەن كوپ بولۋى مۇمكىن، سەبەبى ايتارلىقتاي وزگەشەلىگى كومەسكى ەكونوميكانىڭ سالدارىنان» دەگەن ماتىنىنە بايلانىستى بولۋى ابدەن مۇمكىن.
ايتا كەتەيىك، اۆتورلار رەيتينگتى جاساپ جاتقان كەزدە «نەتتو» جالاقىلاردى ەسەپكە الدى، ءبىراق قازاقستاندا ولار «برۋتتو» جالاقىنى ەسەپتەگەن، ناقتىلاپ ايتساق 96629 دەگەن سومانى قوسقان.
رەيتينگتە ورتاشا جالاقىسى 4896 ەۋرو بولاتىن ليحتەنشتەين كوش باستاپ تۇر، ودان كەيىن موناكو (4436)، ۇشتىكتى شۆەيتساريا (4118) قورىتىندىلايدى. ءتىزىمنىڭ ەڭ سوڭىندا ۋكراينا (178)، مولدوۆا (190) جانە ارمەنيا (232) ەلدەرى تۇر. ايتا كەتەيىك، قازاقستان بۇل تىزىمدە بەلارۋس (419 ەۋرو)، رەسەي (410) جانە ءازىربايجان (402) ەلدەرىنەن الدا.
ەسكە سالا كەتەيىك، مۇنىڭ الدىندا قازاقستانداعى جالاقى كولەمى جاريا ەتىلگەن ەدى. قازاقستاندىق ەر ادامدار ايەلدەرگە قاراعاندا ورتاشا 40 مىڭ تەڭگە ارتىق جالاقى الادى ەكەن. بۇل مالىمەتتى ق ر دەنساۋلىق ساقتاۋ جانە الەۋمەتتىك دامۋ ءمينيسترىنىڭ ورىنباسارى سۆەتلانا جاقىپوۆا ايتتى. ونىڭ ايتۋىنشا، جيناقتاۋشى زەينەتاقى قورىنىڭ 5 ميلليون 900 مىڭ قاتىسۋشىسىنىڭ 3 ميلليون 83 مىڭى - ەر ادام، 2 ميلليون 858 مىڭى - ايەل.
«قازاقستانداعى ورتاشا جالاقى جونىندە ءالى جۇمىس ىستەۋىمىز كەرەك، جۇمىس الاڭى بار. ەگەر قازاقستاندا ەر ادامداردىڭ ورتاشا جالاقى كولەمى 117 مىڭ تەڭگە بولسا، ايەلدەر الاتىن جالاقى مولشەرى 80 مىڭنان ءسال اسادى. ءبىز وسى باعىتتا جۇمىس ىستەيتىن بولامىز»، - دەدى ءمينيستردىڭ ورىنباسارى.