ءانشى مەرۋەرت تۇسىپبايەۆا العان اتاعىن جۋۋدا

استانا. قازاقپارات - ءانشى مەرۋەرت تۇسىپبايەۆا كەشە الماتى قالاسىنىڭ مەيرامحانالارىنىڭ بىرىندە قازاقستاننىڭ ەڭبەك سىڭىرگەن قايراتكەرى اتانعاندىعىنا وراي جاقىندارى مەن دوستارىنىڭ ورتاسىندا تويلاپ ءوتتى.

بۇل جونىندە ءانشى ءوزىنىڭ Facebook-تاعى پاراقشاسىندا جاريالاعان بولاتىن.

«قۇداي قالاسا، تىم جاقىن ادامدارىما 2014 - جىلى العان اتاعىمدى جۋامىن، رەستوراندا ، ك ت ك ارناسى تۇسىرەدى، ف ب -قا فوتولارىن سالامىن، قازىر دايىندىق ۇستىندەمىن»، - دەپ جازعان بولاتىن.

ءانشىنىڭ كىشىگىرىم تويىنا ەڭ جاقىن قۇربىلارى، دوستارى، تۋىستارى كەلدى. كەش بارىسىندا كەلگەن قوناقتار ءانشىنى اتاعىمەن قۇتتىقتاپ، جىلى لەبىزدەرىن ءبىلدىرىپ، باعالى سىيلىقتارىن تابىستادى. سىيلىقتار قاتارىندا «قازاقستاننىڭ حالىق ءارتىسى قولتاڭباڭدى التىن قالاممەن بەر» دەگەن نيەتپەن سىيعا تارتىلعان التىن قالام دا بار. مەرۋەرت تۇسىپبايەۆا كەشتە ءان شىرقاپ، كەلگەن قوناقتاردىڭ كوڭىلىن كوتەردى.

ونەر يەسى وسىعان دەيىن مەملەكەتتىك «دارىن» جاستار سىيلىعى مەن مادەنيەت قايراتكەرى اتاعىن دا العان بولاتىن.

«بۇل مەنىڭ 17 جىل ىشىندە ونەردىڭ وركەندەۋىنە قوسقان ۇلەسىمنىڭ ناتيجەسى دەپ بىلەمىن. پرەزيدەنت - ەل باسقارىپ وتىرعان تۇلعا. ەندەشە، ەلباسىنىڭ قولى قويىلىپ، مەملەكەتتىڭ ءمورى باسىلعان كۋالىك - ماعان دەگەن ەلدىڭ قۇرمەتى، سەنىمى، ءۇمىتى دەپ تۇسىنەمىن. حالىق اراسىندا اتاقتى بولا تۇرا، ەلەۋسىز ءوتىپ جاتقان ازاماتتار بار. سوندىقتان مۇنداي جوعارى ماراپاتتى العان دا ارماندا، الماعان دا ارماندا.

اتاققۇمار ەمەسپىن، ءبىراق 43 جاسىمدا بيىك بەلەستى باعىندىرۋ وڭاي ەڭبەكپەن كەلگەن جوق. باعىمىز شىعار، الماتىدان ۇسىنىلعان 18 ادامنىڭ ىشىندە ءۇش ادامنىڭ جولى بولدى. قامال الاتىن جاستا قولىم جەتكەنىنە ءدان رازىمىن. وسىدان بىرنەشە جىل بۇرىن «جۇلدىزدار وتباسى» جۋرنالى جىل قورىتىندىسى رەتىندە كەش ۇيىمداستىرىپ، قاتىسۋشىلارعا شاعىن مۇسىنشە سىيلادى. بىردە التى جاستاعى ۇلىم ۇيگە قوناققا كەلگەن كىشكەنتاي قىزداردىڭ ءبىرى سول مۇسىنشەمەن ويناپ وتىرعانىن كورىپ، «بۇل انامنىڭ «وسكارى»، تيىسپە!» دەپ قولىنان جۇلىپ الىپ، سۇرتكىشتەگەنى بار. سول ساتتە تەمىر-تەرسەك، باعالى-باعاسىز، جاقسى-جامان بولسىن، مەنىڭ كەز كەلگەن سىيلىعىم بالامنىڭ تاربيەسىنە ۇلكەن اسەر ەتەتىنىن ءتۇسىندىم.

«بالامنىڭ بالاسىنا ماقتانىش، ۇلگى بولىپ قالاتىنداي ناگرادالار الۋىم كەرەك ەكەن» دەپ تۇيگەنمىن. جالپى، مەن ءوز باعامدى بىلەتىن اداممىن. ەشكىمگە ەشتەڭە دالەلدەگىم كەلمەيدى، كىم، قالاي ويلاسا دا ءوز ەركى بۇل سىيلىقتىڭ ەرتەڭ نەمەرەلەرىم «اجەمىز ەلگە ەڭبەگى سىڭگەن قايراتكەر» دەپ ايتا جۇرەتىندەي، ارتىمدا جاقسى ءىز، ماڭگىلىك مۇرا بولىپ قالارىنا قۋانامىن»، - دەگەن بولاتىن «ايقىن» گازەتىنە بەرگەن سۇحباتىندا.

ءبىز دە ءانشىنى اتاعىمەن تاعى دا قۇتتىقتايمىز! 

baistars.kz 

Alashainasy.kz